US Open chempıony Elena Rybakınanyń oıynyn joǵary baǵalady

ASTANA. KAZINFORM — US Open týrnıriniń 2011 jylǵy chempıony, álemniń burynǵy tórtinshi raketkasy Samanta Stosýr qazaqstandyq tennısshi Elena Rybakınamen ótken matchtar ózine aıtarlyqtaı qıyndyq týǵyzǵanyn aıtty, dep habarlaıdy Sports.kz.

Avstralııalyq sportshynyń aıtýynsha, Rybakına jaqsy babynda bolǵan kezde korttaǵy asa qaýipti qarsylastardyń birine aınalady.

- Men ózimdi árdaıym dop laqtyrýdy, qarsylastyń berilisin oqı alatyn oıynshy sanaıtynmyn. Biraq onymen, shamasy, jekeleı synda úsh ret oınadym jáne ár joly abdyrap qalýmen boldym. Onyń berilisin boljaı almadym.

Ol bir ǵana dop laqtyrýdan qalaǵan núktesine soqqy jasaı alady. Qaı jaqqa baǵyttaıtynyn eshqashan bile almaısyń. Ony oqý óte qıyn. Al óz berilisterin ońaı utyp otyrǵan kezde, ol qabyldaýda da erkin oınaı bastaıdy, sebebi qysym azaıady, - dedi Samanta Stosýr.

Onyń sózinshe, qazaqstandyq tennısshiniń joǵary deńgeıde oınaýy úshin qajet barlyq qasıetteri men soqqylary bar.

- Onda tennısten qalaǵanyńnyń bári bar. Eger oıynǵa tolyq daıyn bolsa, ol naǵyz orasan kúshke aınalady, - dep túıindedi Stosýr The Tennis baǵdarlamasynyń sońǵy shyǵarylymynda.

Aıta keteıik, US Open týrnıriniń chempıony atanǵan Samanta Stosýr kásibı mansabynda álemdik tennıstiń eń myqty oıynshylarymen kortta jolyqqan.

Buǵan deıin Elena Rybakına jańa jylda qatysatyn alǵashqy týrnır anyqtalǵany habarlandy.