US Open: Áıelder arasynda fınalǵa shyqqan tennısshiler anyqtaldy

ASTANA. KAZINFORM – AQSh ashyq chempıonatynda áıelder arasynda fınalǵa shyqqan tennısshiler anyqtaldy.

Sońǵy básekege birinshi bolyp álemniń 2-raketkasy, Belarýs ókili Arına Sobolenko joldama aldy.

A.Sobolenko jartylaı fınalda álemniń 12-raketkasy, amerıkalyq Emma Navarrodan aılasyn asyrdy – 6:3, 7:6 (7:2).

Bir saǵat 33 mınýtqa sozylǵan matchta Sobolenko 8 eıspen birge 6 breık-poınttyń teń jartysyn paıdalandy. Navarro 1 eıs, 2 breıkten (5 breık-poınt) asa almady.

Arına Sobolenko ótken jyly da fınalda oınap, taǵy bir amerıkalyq Korı Gaýfqa ese jibergen edi.

A.Sobolenko ekinshi jyl qatarynan hard tósenishinde ótetin qos birdeı «Úlken dýlyǵa» týrnıriniń fınalyna shyǵyp otyr. 2023 jáne 2024 jyldary ol Aýstralııa ashyq chempıonatynyń jeńimpazy atandy. Mundaı nátıjege osy kezge deıin tennıs tarıhynda Shteffı Graf, Monıka Selesh, Martına Hıngıs jáne Vıktorııa Azarenko qol jetkizgen.

Bıyl AQSh dodasynda belarýs tennısshisimen chempıondyq ataqty amerıkalyq, álemniń 6-raketkasy Djessıka Pegýla sarapqa salady. Ol kambek jasap, dúnıejúzilik reıtıngide 52-orynda turǵan chehııalyq Karolına Mýhovany qapy qaldyrdy – 1:6, 6:4, 6:2.

Eki saǵat 12 mınýtqa sozylǵan tartysty oıynda amerıkalyq tennısshi 1 eıs, 5 breıkpen (11 breık-poınt) erekshelendi. Mýhova 6 eıs, 4 breıkti (11 breık-poınt) qanaǵat tutty.

Ótken jyly da jartylaı fınalǵa deıin jetken K.Mýhova sol kórsetkishin qaıtalady. Al D.Pegýla óz sporttyq jolynda alǵash ret AQSh birinshiliginiń fınalyna shyqty. Ol osy tabysy arqasynda qazirgi kezde WTA Live reıtıngisinde 3-satyǵa kóterildi. Buǵan deıin shırek fınalda E.Navarrodan jeńilip qalǵan K.Gaýff 3-ten 6-orynǵa túsip, qazaqstandyq Elena Rybakına úzdik úshtikke ilikken edi. Endi E.Rybakınany dúısenbide jańartylatyn reıtıngide D.Pegýla basyp ozady.

Eske sala keteıik, budan buryn AQSh ashyq chempıonatynda qazaqstandyq tennısshilerdiń qansha tabys tapqanyn jazǵan bolatynbyz.