US Open: Anna Danılına jartylaı fınaldan tys qaldy

ASTANA. KAZINFORM — Qazaqstannyń juptyq syndaǵy birinshi, álemniń 48-raketkasy Anna Danılına AQSh ashyq chempıonatynyń jartylaı fınalyna shyǵa almady.

Qazaqstandyq tennısshi reseılik Irına Hromachevamen birge shırek fınalda jarystyń 7-raketkalary, ýkraınalyq Lıýdmıla Kıchenok – latvııalyq Elena Ostapenkomen betpe-bet keldi. 

Tartysty órbigen birinshi partııada qazaqstandyq-reseılik jup bastapqyda 2:0 esebimen alǵa shyqqanymen, taı-breıkte Kıchenok – Ostapenko des bermedi – 7:6 (7:2).

Ekinshi sette uzaqqa sozylǵan jetinshi geımde Hromacheva dop bergende, jıirek qatelesip, qarsylas dýet segizinshi breık-poıntty paıdalanyp ketti – 4:3. Sodan keıin Ostapenko matchqa dop bergende, Kıchenok ekeýi óz múmkindigin jibergen joq – 6:4.

Bir saǵat 47 mınýtqa sozylǵan báseke barysynda Danılına – Hromacheva 3 eıs jasap, 1 breık-poıntty paıdalandy. Ýkraınalyq-latvııalyq jup 2 eıs, 2 breıkpen (10 breık-poınt) kózge tústi.

Osylaısha, AQSh chempıonatynda eresekter arasynda Qazaqstannan eshkim qalmady. 

Eske sala keteıik, budan buryn Beıbit Juqaevtyń Shanhaıda kambek jasap, ekinshi aınalymǵa ótkenin jazǵan bolatynbyz.

Sondaı-aq Sonıa Jıenbaeva AQSh ashyq chempıonatynda jasóspirimder arasynda úshinshi aınalymǵa shyqty.