US Open: Andreı Golýbev bastapqy kezdesýin sátti ótkizdi

ASTANA. QazAqparat – Qazaqstandyq Andreı Golýbev Nıý-Iorkta juptyq synda AQSh ashyq chempıonatynda bastapqy kezdesýin sátti ótkizdi, dep habarlaıdy QazAqparat tilshisi.

Qazaqstandyq tennısshi reseılik Roman Safıýllınmen birge alǵashqy aınalymda osy jarysqa arnaıy shaqyrtý alǵan amerıkalyqtar Aleksandr Kovachevıch – Nıkolas Moreno-De-Alboranmen sheberlik talastyrdy.

Qazaqstandyq-reseılik jup bir saǵattan astam ýaqytqa sozylǵan matchta 6:4, 6:3 esebimen jeńiske jetti.

A.Golýbev pen R.Safıýllın úshinshi aınalymǵa shyǵý úshin chempıonattyń altynshy raketkalary bolyp tirkelgen úndistandyq Rohan Bopanna – aýstralııalyq Mettıý Ebdenmen talasady.

Osylaısha, AQSh ashyq chempıonatynda juptyq synda Qazaqstannan Anna Danılına men Andreı Golýbev jarysty jalǵastyrýda.

Al jekeleı synda Qazaqstannyń birinshi, álemniń 4-raketkasy Elena Rybakına úshinshi aınalymda 2 qyrkúıek kúni tańǵa qaraı reıtıngte 30-orynda turǵan tájirıbeli rýmynııalyq tennısshi Sorana Kyrstıamen kezdesedi. Ony jeńse, Elena alǵash ret AQSh ashyq chempıonatynyń tórtinshi aınalymyna shyǵady.

Eske sala keteıik, budan buryn Elena Rybakınanyń AQSh ashyq chempıonatynyń úshinshi aınalymyna ótkenin jazǵan bolatynbyz.

Sondaı-aq Anna Danılına ekinshi aınalymǵa joldama aldy.