US Open: Aleksandr Býblık tórtinshi aınalymnan tys qaldy
ASTANA. KAZINFORM – Qazaqstannyń birinshi, álemniń 16-raketkasy Aleksandr Býblık AQSh ashyq chempıonatynyń tórtinshi aınalymyna shyǵa almady.
Qazaqstandyq tennısshi úshinshi aınalymda álemniń 21-raketkasy, amerıkalyq Tommı Polmen sheberlik baıqasty.
Qarsylastar osyǵan deıin eki ret kezdesken. 2025 jyly Maıamıde Pol 5:7, 7:5, 6:4 esebimen basymdylyq tanytqan. Degenmen ótken jylǵy AQSh ashyq birinshiliginiń úshinshi aınalymynda Býblık bes settik marafonda 7:6(5), 6:7(4), 6:3, 6:7(5), 6:1 esebimen ese qaıtarǵan edi.
Bul joly birinshi partııa sońynda amerıkalyq sportshy breık jasap ketti – 6:4.
Ekinshisinde Aleksandr ese qaıyrdy – 6:3.
Úshinshisinde taı-breıkte Býblıktiń asyǵy alshysynan tústi – 7:6 (7:4). Alaıda tórtinshi sette oıyny júrmedi – 1:6.
Sheshýshi, besinshi partııada Pol 4:0 esebimen alǵa ketti. Esep 5:1 bolyp, amerıkalyq tennısshi matchqa dop bergende, Býblık esepti qysqartty – 2:5. Biraq odan árige shamasy jetpedi – 3:6.
Úsh saǵat 12 mınýtqa sozylǵan básekede Býblık 16 eıspen birge 7 breık-poınttyń tek ekeýin paıdalandy. Pol 10 eıs, 6 breıkpen (8 breık-poınt) kózge tústi.
T.Pol shırek fınalǵa shyǵý úshin álemniń 3-raketkasy, ıspanııalyq Karlos Alkaras nemese reıtıngide 113-oryndaǵy qytaılyq Ý Ibınniń qaı jeńgenimen talasady.
A.Býblık ótken jyly AQSh chempıonatynyń tórtinshi aınalymyna deıin jetken edi. Bıyl sol nátıjesin qaıtalaı almady.
Eske sala keteıik, budan buryn AQSh ashyq chempıonatynda Elena Rybakına úshinshi aınalymǵa joldama alǵanyn jazǵan edik.
Sondaı-aq Anna Danılına juptyq synda ekinshi aınalymǵa ótti.
