US Open: Aleksandr Býblık bes setke sozylǵan matchta jeńilip qaldy
NUR-SULTAN. QazAqparat – Qazaqstannyń birinshi, álemniń 37-raketkasy Aleksandr Býblık US Open týrnıriniń úshinshi aınalymyna shyǵa almady, dep habarlaıdy QazAqparat tilshisi.
Osy «Úlken dýlyǵa» dodasynyń 31-raketkasy bolyp tirkelgen A.Býblık ekinshi aınalymda amerıkalyq Djek Sokpen kezdesti.
D.Sok – qazirgi kezde reıtıngte 184-orynda turǵanymen, budan tórt jyl buryn segizinshi satyǵa deıin kóterilgen tájirıbeli oıynshy.
Qarsylastardyń buǵan deıin joldary toqaılaspaǵan.
Birinshi sette taı-breıkte amerıkalyq sportshy ábjildik tanytty – 7:6 (7:3). Ekinshisinde A.Býblık sondaı tartysty geımde ese qaıyrdy – 7:6 (7:2).
Úshinshisinde D.Sok 6:4 esebimen qaıta alǵa shyqsa, tórtinshisinde qazaqstandyq tennısshi tarazy basyn teńestirdi – 6:4.
Sheshýshi, besinshi partııada kort ıesi jeńiske jetti – 6:3.
A.Býblık 3 saǵat 32 mınýtqa sozylǵan match barysynda 40 eıs jasap, 14 breık-poınttyń altaýyn paıdalandy. D.Soktyń enshisinde – 6 eıs, 7 breık (17 breık-poınt).
Osylaısha AQSh ashyq chempıonatynda jekeleı synda Qazaqstannan Elena Rybakına ǵana qaldy. Ol úshinshi aınalymda álemniń burynǵy birinshi raketkasy, rýmynııalyq Sımona Haleppen oınaıdy.
Eske sala keteıik, budan buryn Elena Rybakınanyń US Open týrnıriniń úshinshi aınalymyna shyqqanyn jazǵan bolatynbyz.
