US Open: 18 jastaǵy tennısshi chempıon atanyp, rekordtyq nátıjege qol jetkizdi
NUR-SULTAN. QazAqparat – Tennısten AQSh ashyq chempıonatynda áıelder arasynda 18 jastaǵy brıtandyq Emma Radýkaný chempıon atanyp, rekordtyq nátıjege qol jetkizdi, dep habarlaıdy QazAqparat tilshisi.
Brıtandyq sportshy «Úlken dýlyǵa» týrnırinde jarysty irikteý saıystarynan bastap, jeńimpaz atanǵan birinshi tennısshi retinde tarıhta qalatyn boldy.
Kásipqoı tennıstegi jolyn bıyl ǵana bastaǵan, reıtıngte nebári 150-orynda turǵan E.Radýkaný fınalda 19 jastaǵy kanadalyq Leıla Fernandesti 6:4, 6:3 esebimen utty.
Emma osy jarysta birde-bir sette utylyp kórgen emes.
Endi ol álemdik reıtıngte 23-satyǵa kóteriletin bolady.
Bul – 1999 jylǵy US Open dodasynan keıin 20 jastan kishi tennısshiler baq synaǵan birinshi fınal. Ol jyly 17 jastaǵy, ataqty amerıkalyq Serena Ýılıams ózinen bir jasqa úlken shveıtsarııalyq Martına Hıngısti utqan edi.
Eske sala keteıik, budan buryn qazaqstandyq jas tennısshilerdiń Ýkraınada ótken jarysta chempıon atanǵanyn jazǵan bolatynbyz.
Foto:reuters.com
