Úrjarlyqtar Zyrıan aýdanyna gýmanıtarlyq kómek jiberdi
Kórshiles aýdanǵa bet alǵan qaıyrymdylyq kerýenin aýdan ákiminiń orynbasary Serikqazy Sádýaqasov bastap bardy. Halyq tasqynnan zardap shekken zyrıandyqtarǵa gýmanıtarlyq kómek retinde azyq túlik pen kıim-keshekter usynǵan bolatyn.
«Árıne, apat aıtyp kelmeıdi. Mundaı jaǵdaıda «kóp túkirse kól bolar», «jumyla kótergen júk jeńil» degen qaǵıdany berik ustanǵandar apattyń saldaryn jeńildetýge septigin tıgizeri anyq. Bizdiń aýdanymyzdyń barlyq eldi meken turǵyndary qaıyrymdylyq sharasyna bir kisideı atsalysty. Osyndaı izgi nıet kóńil qýantady», - deıdi aýdan ákiminiń orynbasary Serikqazy Sádýaqasov.
Esterińizge sala keteıik, Zyrıan aýdanynda oryn alǵan tasqyn saldarynan jeti eldi mekendi sý basyp qalǵan bolatyn.
Sý kóterilgen sátte-aq aýdan boıynsha myńǵa jýyq adam qaýipsiz jerge kóshirilgen edi.
Sońǵy aqparattarǵa súıensek, búginde aýdanda jaǵdaı ońalyp, adamdar úılerine orala bastady. Degenmen, qazir sý basqan ǵımarattardyń kóbinen syzdyń taby aıqyn seziledi, talaı úıdegi jıћaz ben turmystyq tehnıka jaramsyz bolyp qalǵan. Onyń ústine, turǵyndar tósek-oryn jabdyqtary, kıim-keshek pen azyq-túlik ónimderine muqtaj.
Osyǵan oraı, «Nur Otan» partııasynyń Úrjar aýdandyq fılıaly uıytqy bolyp, qysyltaıań sátte jerlesterge kómek qolyn sozý maqsatynda gýmanıtarlyq jylý jınaý naýqanyn jarııalaǵan bolatyn. Qýantarlyǵy, oǵan aýdannyń ár túkpirinen kásipkerler men qarapaıym turǵyndar ún qatyp, qoldaý bildirdi.