Úrjarlyq jas zerger qazaqtyń ulttyq qolónerin nasıhattap júr
ÚRJAR. QazAqparat - Halqymyzdyń tarıhynda jasaǵan buıymdary talaıdy tamsandyrǵan zergerler kóp bolǵanyn, ultymyz úshin bul ónerdiń jat emestigin jaqsy bilemiz. Búgingi kúni de aramyzda qazaqtyń ulttyq qolónerin jetildirip, ádemi de aıshyqty nebir buıymdar jasaıtyn sheberler, zergerler az emes. Desek te úrjarlyq jas zerger ári sheber Ertaı Sársenovtyń týyndylary erekshe bir yqylaspen, qajyrly eńbekpen jasalǵan dúnıeler ekendigin baıqap, baǵalap júrgender qatary kóp.
Qazaq zergerlik óneri atadan balaǵa mırasqa berilip kele jatqan óner deýge bolady. Sebebi, buıymnyń qalaı jasalǵanyn kózben kórmeıinshe, ony seziný de esh múmkin emes. Árbir sheber óz bilgeniniń qyr-syryn urpaǵyna, shákirtterine túsindirip, úıretip ketkendikten be, kóbine zergerler babasynda osy ónermen aınalysqan sheberler bolǵan otbasydan shyǵyp jatady. Úrjarlyq Ertaı da atasynan ákesine, ákesinen ózine daryǵan ónerdi jastaıynan damytyp, búgingi kúni óziniń tabar tabysyna, dóńgeleter kásibine aınaldyryp otyr.
«Meniń atam Sársen ózi seri, ózi ańshy, ózi sheber adam bolǵan. Odan bizge mura bolyp qalǵan at ábzelderi de áli kúnge saqtaýly. Ákem de sheberlik pen ustashyldyqpen aınalysady. Bala kezimde onyń qolynan túrli áshekeıli buıymdardyń qalaı shyqqanyn bastan-aıaq baqylap, talaı kýási de boldym. Mektep bitirgennen keıin, Almatyǵa kelip, Abaı atyndaǵy ulttyq pedagogıkalyq ýnıversıtetiniń «qolóner» mamandyǵyna oqýǵa tústim. Ony bitirgennen keıin, tájirıbeli usta ári zerger Serikqalı Kókenovtyń janynda júrip, kóp tájirıbe jınaqtadym»-deıdi Ertaı Sársenov.
Áshekeıden bólek ol qońyr úndi qobyzdar ázirleıdi. Qobyz - baǵzydan kele jatqan tańǵajaıyp aspap. Sondyqtan dombyra emes, qobyz jasaýǵa degen qumarlyǵy uzaq tolǵanystyń arqasynda, daralaný maqsatynda paıda bolǵan eken. «Oqý bitirip, dıplomdyq jumysty jazar kezimde men qatty oılandym. Jergilikti ýnıversıtettiń murajaıyna kirip, qyzmetkerinen bizge ne jetispeıdi dep suraǵanymda «bizde nar qobyz joq» dep jaýap berdi. Sodan óz ustazyma kelip, qobyz jasaýda maǵan jetekshilik etýin surap, ózimdi usyndym. Osylaısha, dıplomymdy qorǵap shyqtym, alǵashqy qobyzymdy da jasadym, - deıdi Ertaı Altaıuly.
Alǵashqy jasaǵan qobyzy ózi bilim alǵan oqý ornynyń murajaıyna tapsyrylyp, artynan talaı baıqaýlarda júldeli oryndarǵa ıe bolǵan eken. Sheberdiń qolynan týǵan qobyzdardy tek mýzykalyq aspap túrinde ǵana emes, úıge arnalǵan jádiger retinde de saqtaýǵa, kórneki orynǵa qoıýǵa ábden bolady. Óıtkeni sheber qobyzdy tuǵyrymen qosa jasaıdy.
«Qobyzdy qatty aǵashtardan jasaıdy. Bizdiń Úrjar aýdanynda qara aǵash kóp jáne onyń qurylymy óte ádemi. Sondyqtan men óz qobyzdarymdy qara aǵashtan jasaımyn», - deıdi sheber.
Nar qobyzdy daıyndaýǵa 1 jyl ýaqyt ketse, qyl qobyz 3 aıdyń ishinde ázirlenedi eken. «Qobyzǵa degen tapsyrystyń basym kópshiligi Almaty qalasynan kelip túsedi. Keıbir turǵyndar ony syı retinde de jasatady. Osy kúnge deıin jıyrma shaqty qobyz jasaǵan ekenmin», - dep atap ótti ol..
Ertaı Sársenov Úrjar aýdanyndaǵy Jańa tilek aýyldyq okrýginde M.Áýezov atyndaǵy orta mektepte eńbek páninen sabaq beredi. Ol óz bilgenin bir ǵana balaǵa emes, birneshe synypqa qatar úıretedi. Sondaı-aq, aýylda arnaıy tseh ashyp qoıǵan. Aýyldastary da Ertaıdyń sheberligine tánti.
