Úrjarlyq kópbalaly analar: Kúnine myń dana maska tigip, tegin taratamyz
ÚRJAR. QazAqparat – Shyǵys Qazaqstan oblysy Úrjar aýdany Maqanshy aýylyndaǵy kópbalaly analar ıgi isterdi qolǵa alýda. Qarttarǵa, az qamtylǵan otbasylarǵa azyq-túlik jetkizip berip jatqan olar endi birneshe márte paıdalanýǵa bolatyn medıtsınalyq maskalar tigýde.
Bul jaıly QazAqparat tilshisine kópbalaly analardyń biri Rysaldy Muhametqalıeva aıtyp berdi.
«Aýyldaǵy kópbalaly analar WhatsApp messendjerinde top ashqanbyz. Sol jerde bárimiz aqyldasyp, qol qýsyryp otyrmaı, paıdaly is jasaýǵa bekindik. Kásipkerlerdiń qoldaýymen azyq-túlik alyp, zeınetkerlerge, jaǵdaıy tómen januıalarǵa jetkizip berdik. Biraq osymen shektelip qalǵymyz kelmedi», - deıdi ol.
Oılana kele, analar dárihanalarda tapshy bolyp jatqan medıtsınalyq maska tigýge bel baılaǵan. Bul bastamaǵa Úrjar aýdanynyń ákimi Nurjan Toqseıitov te qoldaý bildirip, qajetti materıaldarmen qamtamasyz etipti.
«Jospar boıynsha kúnine myńǵa jýyq maska tigip, keshke qaraı zeınetkerlerge, az qamtylǵan otbasylarǵa, kópbalaly januıalarǵa taratamyz. Esh aqysyz. Elimizge kelgen ýaqytsha synaqtardy birge eńseremiz. Eń bastysy, osyndaı qıynshylyqty jeńý jolynda jumyla áreket eteıik», - deıdi Rysaldy Muhametqalıeva.
Jalpy, aýdanda juqpaly indettiń aldyn-alý boıynsha shuǵyl áreket etý toptary qurylǵan. Barlyq qaýipsizdik sharalary qolǵa alynyp, júzege asyrylýda.
«Igi isti qolǵa alǵan analar qaýymy kópshilikke úlgi kórsetýde. Osyndaı bastamalarǵa árkez qoldaý kórsetýge ázirmiz», - deıdi aýdandyq ishki saıasat bóliminiń basshysy Eldos Beısenov.
