Úrjarlyq balyqshylar ózara synǵa tústi
ÚRJAR. QazAqparat - Shyǵys Qazaqstan oblysy Úrjar aýdanyna qarasty Baqty aýyldyq okrýginde aımaqtyń áýesqoı balyqshylary ózara synǵa tústi, dep habarlaıdy QazAqparat tilshisi.
Aıta keteıik, balyqshylar saıysyn «Qýan-Aı» sharýa qojalyǵynyń basshysy Qýandyq Sarybaev 2013 jyldan bastap uıymdastyryp keledi.
Jıyrmadan astam balyqshylar qatysqan saıys Baqtydan Qarabasqa deıin bes metrdeı jerde «Qýan-Aı» sharýashylyǵyna tıesili kólshikte ótti. Búgingi kúni joǵaryda atalǵan qojalyq balyq sharýashylyǵymen aınalysady. Bul shaǵyn kólshikke aq amýr, tuqy (karp), sazan, móńke balyǵy (karas), forel sııaqty balyqtardyń shabaqtary jiberilgen. Balyq tuqymdary Qapshaǵaı, Buqtyrma sý qoımasynan ákelinipti.
«Bul saıysty uıymdastyrýdaǵy basty sebebim - jas urpaqtyń bos ýaqyttaryn qalta telefondary men kompıýterdiń aldynda ótkizbeı, balyq aýlaý mádenıetin úıretý, tabıǵatty aıalaýǵa, qorshaǵan ortany qorǵaýǵa baýlý sııaqty basqa da paıdaly isterge kóńil bólse eken degen maqsat. Jyldan-jylǵa qatysýshylar sany kóbeıip keledi. Máselen, ótken jyly Semeıden, Qytaıdan balyqshylar kelip qatysqan bolatyn», - deıdi shara uıymdastyrýshysy Qýandyq Seısenuly.
Úsh saǵatqa sozylǵan saıys nátıjesinde jekeleı jarysta úrjarlyq Talǵat Sandybaev jeńimpaz atandy. Shalqar Qasymjanov - ekinshi, Haırolla Erlanuly úshinshi oryndy enshiledi.
Al komandalyq jarysta Úrjar aýylynyń balyqshylary birinshi, maqanshylyqtar ekinshi, úshinshi oryndy baqtylyqtar qanaǵat tutty. Balyqshylardyń arasynda bolatyn «Kútpegen olja» atty marapatqa Júnis Zańserik, Haırolla Erlanuly «Eń jas balyqshy» ataǵyna ıe boldy. Aıta keterligi, balyqshylar saıysyna Arýjan esimdi qyz bala da qatysty. Oǵan «Balyqshy-qyz» ataǵy berildi.
Jeńimpazdardyń barlyǵy aýdan ákiminiń «Alǵys hattarymen» jáne «Qýan-aı» sharýa qojalyǵynyń eskertkish syılyqtarymen marapattaldy.
