Úrjardaǵy 12 balanyń gepatıtke shaldyǵýynyń sebebi anyqtaldy - ShQO
ASTANA. QazAqparat - Úrjar aýdanynda A gepatıtimen aýyrǵan balaǵa vırýs Semeıden kelgen qonaqtan juqqan. Bul týraly Astanada ótken baspasóz máslıhatynda QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy, bas sanıtarlyq dáriger Jandarbek Bekshın málim etti, dep habarlaıdy «QazAqparat» HAA tilshisi.
«ShQO Úrjar aýdanynyń Sholpan aýylynda jaǵdaıǵa toqtalsaq, qyrkúıek aıynda A vırýstyq gepatıtiniń eki oqıǵasy oryn aldy. Bul jaǵdaıda turmystyq qarym-qatynas nátıjesinde aýrý taraǵan, ıaǵnı osy aýylǵa Semeı qalasynan qonaq kelgen jáne onyń gepatıtpen aýyryp júrgendigi anyqtaldy. Sonyń saldarynan vırýs oqýshyǵa juqqan», - dep túsindirdi Bekshın Ortalyq kommýnıkatsııalar qyzmetinde.
Osy oraıda ol qazan aıynda aýrýdy juqtyrýdyń bir oqıǵasy, keıinnen jeltoqsanda eki jaǵdaıy tirkelgenin jetkizdi.
«Bul oraıda baılanysta bolǵan adamdardyń barlyǵy qadaǵalaýǵa alyndy. Sonymen birge taǵy 6 adamdy anyqtadyq, olar «A» gepatıtin tasymaldaýshy bolǵan. Bul adamdarda klınıkalyq belgiler baıqalmady. Aýrýdyń ary qaraı taralýyn toqtattyq. Búginde aýyldaǵy jaǵdaı tolyq baqylaýda tur. Mektepti kúsheıtilgen dızınfektsııalyq rejimge kóshirdik, sondaı-aq kabınettik bilim berý júıesine shekteý engizildi», - dep naqtylady ol.
Onyń sózine qaraǵanda, 140 balaǵa gepatıtten ekpe jasaldy. Aýrýǵa shaldyqqan 11 oqýshyǵa vaktsına jasalmaǵan kórinedi. Al on ekinshi bala mektepke baratyn jasqa jetpegen.
Sóz sońynda bas sanıtarlyq dárigen Shyǵys Qazaqstandaǵy Úrjar aýdanynyń Sholpan aýylynda 49 balaǵa «A» vırýsty gepatıti juqty degen aqparatty joqqa shyǵardy.
