Úrjarda túsirilgen «Jeti ata» kórkem fılmi kórermenge jol tartady
ÚRJAR. QazAqparat - Shyǵys Qazaqstan oblysynda tuńǵysh ret jeti ata týraly kórkem fılm túsirildi. Kınotýyndy aldaǵy naýryz aıynyń 3-5 kúnderi aralyǵynda aýdandyq mádenıet úıinde kórsetile bastaıdy, dep habarlaıdy «QazAqparat» HAA tilshisi.
Kórkem fılmniń jalpy bıýdjeti 2 mln 300 myń teńgeni quraǵan. Kınotýyndynyń jalpy mazmunynda negizinen jastardy ata-tekterin umytpaı, jeti atasyn bilýge shaqyrý ıdeıasy qamtylǵan.
«Fılmge kóptegen aýdan jastary men óńirimizdiń bedeldi kásipkerleri kómek qolyn sozdy. Atap aıtsaq, halyq túsirýge qajetti kólik, úı taǵy basqa materıaldyq kómek kórsetti», - deıdi fılmniń bas prodıýsseri Farhat Súleımenov.
Aıta keterligi, QR eńbek sińirgen ártisi, «Qunanbaı» fılminiń rejısseri Dosqan Joljaqsynov Úrjarǵa kelgen saparynda kınonyń mazmunymen tanysyp, «Táńir» kınostýdııasy dep atap, aq batasyn berip ketken eken.
Túsirilim ótken jyldyń maýsym aıynda qolǵa alynǵan. Fılmdegi basty rólderge jergilikti teatr akterlary men Úrjar jastary tartylyp otyr. Atap aıtqanda, basty rólderdi Turan ýnıversıtetiniń 2-kýrs stýdenti Bolat Súleımenov pen Semeı qalasyndaǵy mýzykalyq kolledjiniń 1-kýrs stýdenti Janerke Nurjaýova, «Kerýen» halyqtyq teatrynyń akteri, aýdandyq mádenıet úıiniń ártisi Serik Shákenov, Anar Sadyqovalar somdaǵan.
Kórkem týyndy Úrjar aýylynda túsirilgen. Ottaı ystyq mahabbat, shynaıy sezim, úmit kúter izdenis, jaýaby joq suraqtar, ókinish pen janaıqaı, ómir úshin kúres - osynyń bári fılmde kórinis tabady.
Fılmdegi ǵashyqtardyń basyndaǵy shyrǵalań da osy ata dástúrimen tyǵyz baılanysyp, mahabbat oqıǵasynyń aıaǵy baqytty otbasynyń jeti atany urpaqqa dáripteýimen túıindeledi.
