Úrjarda sońǵy 30 jylda ekinshi kópqabatty turǵyn úı salynbaq
ÚRJAR. QazAqparat - Shyǵys Qazaqstan oblysy Úrjar aýdanynda 30 páterli kópqabatty turǵyn úı salynady. Bul sońǵy 30 jyldyń shamasynda boı kóteretin ekinshi kópqabatty turǵyn úı bolmaq, dep habarlaıdy «QazAqparat» HAA tilshisi.
Aıta keteıik, aýdan ortalyǵyndaǵy kóppáterli turǵyn úıler 80-shi jyldardyń sońynda salynǵan bolatyn. Sodan beri múldem kópqabatty turǵyn úı salynbaǵan. Tek 2015 jyly aýdan ákimi Serik Zaınýldınniń bastamasymen 27 páterli turǵyn úı boı kóterip, nátıjesinde 27 januıa baspanaly boldy.
Bıyl memlekettik «Óńirlerdi damytý» baǵdarlamasy aıasynda taǵy 30 páterli kópqabatty turǵyn úı salynatyn bolady. Buǵan memleket qazynasynan 280 mıllıon teńge qarastyrylyp otyr. Turǵyn úı qurylysy boıynsha jobalaý-smetalyq qujattamalary ázirlenip, memlekettik saraptamadan ótkizilgen.
«Іshindegi paıdalanatyn qural-jabdyqtar da, qurylys materıaldary da tolyqtaı otandyq ónimderden jasalady. Ortalyqtandyrylǵan sýmen, ortalyqtandyrylǵan jylýmen qamtamasyz etiledi. Jalpy, qaladaǵy úılerden esh kemdigi bolmaıdy», - deıdi Úrjar aýdandyq Turǵyn úı-kommýnaldyq sharýashylyq jáne qalaqurylysy bóliminiń sektor meńgerýshisi Soltanǵazy Elemesov.
Aıta keterligi, qazirgi kúni aýdanda 600-den astam adam baspana kezeginde tur.
