Úrjarda qatty aıazdan mektepterde sabaq toqtatyldy
ÚRJAR. QazAqparat - Búgin Shyǵys Qazaqstan oblysy Úrjar aýdanynda qatty aıazǵa baılanysty aýdan ortalyǵyndaǵy mektepterde birinshi aýysymnyń 1-9-synyptarynda sabaq bolǵan joq. «Qazgıdromet» saqyrlaǵan aıaz erteń de saqtalatynyn boljap otyr, dep habarlaıdy «QazAqparat» tilshisi.
«Qazgıdromet» mamany Vasılıı Dekanskııdiń aıtýynsha, 12 qarasha aýdanda aıaz kúsheıip, túnde aýa temperatýrasy 32 gradýsqa deıin tómendegen.
«Aýa temperatýrasy búgin, qarashanyń 13-inde jergilikti saǵat 07.00-de 27,7 gradýs sýyqty kórsetti. Osyǵan baılanysty sabaqtyń bolmaıtyny jóninde eskertý jasaldy»,-deıdi meteorolog Vasılıı Dekanskıı.
Aıta keteıik, aýdanda sońǵy kúnderi kún qatty sýytyp ketti. Erteń de aıaz bolady, shamamen 27 gradýsqa deıin sýytady dep boljanǵan.
