Úrjarda Qabanbaı batyrǵa arnalǵan eskertkish ashylady
ALMATY. QazAqparat - Qarakereı Qabanbaı batyrǵa arnap, Shyǵys Qazaqstan oblysy Úrjar aýdanynda eskertkish ashylady. Bul týraly búgin Almatyda ótken «Qabanbaı batyr ádebıet pen tarıhta» atty respýblıkalyq ǵylymı-tájirıbelik konferentsııada belgili boldy.
Almatydaǵy Ǵylym ordasynda ótken konferentsııada sóz alǵan jazýshy, memlekettik syılyqtyń ıegeri Qabdesh Jumadilov eskertkishti óz qarjysyna saldyryp otyrǵan Qusman Shalabaevqa alǵys aıtty. «Úrjarda óz qarjyńyzǵa batyr babamyzǵa eskertkish ornatqaly otyrsyz, alǵys aıtamyz», - dedi Qabdesh Jumadilov.
Eskertkish 2016 jyldyń 27 qazanynda Úrjar eldi mekeninde ashylady. Eskertkish avtory: Qusman Shalabaev, músinshi: Bolat Qusaıynov. Eskertkish bıiktigi 9,5 metr.
