Úrjarda eki taýarly-sút fermasy ashyldy

ÚRJAR. QazAqparat - Shyǵys Qazaqstan oblysy Úrjar aýdanynda eki birdeı taýarly-sút fermasy ashyldy. Osynyń arqasynda aýdannyń sút óndirý áleýeti arta túspek, dep habarlaıdy «QazAqparat» HAA tilshisi.

Aıta keterligi, óńirlerde syrttan keletin sút ónimderin azaıtý týraly tapsyrma Elbasynyń «100 naqty qadam» Ult josparynda júktelgen bolatyn. Osyǵan baılanysty Úrjar aýdanynda sútti mal sharýashylyǵyn damytýǵa erekshe kóńil bólinip keledi.

Al taýarly sút fermasyn ashyp otyrǵan maqanshylyq kásipker Bolatbek Tyshanbekov 2013 jyldan beri aýyl sharýashylyǵy salasynda bıznespen aınalysady. Osy fermany ashý arqyly ol  12 turǵyndy jumyspen qamtydy. «Quny 200 mıllıon teńgeni quraıtyn keshen 200 bas iri qaraǵa shaqtalyp otyr. Ferma sút jáne sút ónimderi óndirisin damytý maqsatynda ınvestjoba boıynsha iske asty. Italııanyń sońǵy úlgidegi «Interplıýs» fırmasynyńqondyrǵylarymen jabdyqtaldy. Al 100 bas asyl tuqymdy mal Reseıden ákelindi», - deıdi kásipker.

 Endi Bolatbek Tyshanbekov shaǵyn sút óńdeıtin tseh salyp, aıran, qaımaq pen irimshik shyǵarýdy kózdep otyr. Búginde onyń mal bordaqylaý alańynda 300 bas iri qara bar.

Aýdandaǵy ekinshi sút fermasy Kóldeneń aýyldyq okrýginde «ıÝbıleınyı» sharýa qojalyǵynda ashyldy. 200 basqa arnalǵan sút fermasyna Reseıden 115 bas sımmentaldy iri múıizdi qara mal satyp alynǵan. Mamandardyń aıtýynsha sımmentaldy tuqymynyń jas tólderi jaqsy kútimniń arqasynda jyldam salmaq qosa alady. Asyl tuqymnyń osy túri basqalarǵa qaraǵanda sútiniń joǵary sapasymen erekshelenedi, ózge sútti tuqymdarǵa qaraǵanda maılylyǵy da joǵary.  

Aıta keterligi, shyǵys óńiri - elimizde sút óndirýden alǵashqy oryndy ıelenedi. Óńirde iri sút óńdeý kásiporyndarynyń shoǵyrlanǵandyǵyna qaramastan, sút shıkizatynyń 70 paıyzy aýyl turǵyndarynyń enshisinde.