Úrjarda eki kishkene bala aryqtyń sýyna batyp ketti
URJAR. QazAqparat – Úrjardaǵy sýarmaly aryqta úsh jasar 2 balanyń denesi tabyldy, dep habarlaıdy QazAqparat Altaynews-ke silteme jasap.
Aryqqa túsip jazataıym bolǵan 3 jastaǵy eki balanyń ólimi bútin bir aýyldy aıaǵynan tik turǵyzdy.
17 mamyr kúni saǵat 13.40-ta Úrjar aýdandyq polıtsııa bólimine Eltaı aýylynda eki kishkene balanyń joǵalyp ketkeni týraly habar túsken.
Polıtsııa qyzmetkerleri jedel izdeýge kirisedi. Sondaı-aq, eki balany jergilikti turǵyndar men qutqarýshylar da izdeı bastaıdy.
«Nátıjesinde balalardyń denesin úılerinen 350 metr jerdegi sýarmaly aryqtan tapty. Atalǵan fakt boıynsha sotqa deıingi tergeý bastaldy, ólimniń sebebin anyqtaý úshin sot-medıtsınalyq saraptama taǵaıyndaldy jáne onyń nátıjesi boıynsha protsessýaldyq sheshim qabyldanady», - dep habarlaıdy ShQO PD baspasóz qyzmeti.
