Úrjarda búrkitshilerdiń HІІ chempıonaty ótedi
ÓSKEMEN. QazAqparat - 3-4 aqpan kúnderi Shyǵys Qazaqstannyń Úrjar aýdanynda Astananyń 20 jyldyǵyna arnalǵan eresek búrkitshilerdiń HІІ chempıonaty ótedi, dep habarlaıdy QazAqparat tilshisi.
Osymen 12-ret uıymdastyrylǵaly otyrǵan báseke ekinshi jyl qatarynan Shyǵys Qazaqstanda ótpek. Oǵan 10 oblystyń qusbegileri qatysady.
«Búginniń ózinde jeti óńirdiń delegatsııasy kelip úlgerdi. Jalpy jıyny 40 búrkit, 78 qarshyǵa, tuıǵyn, suńqar sııaqty qustar baq synaıdy dep kútilýde», - deıdi uıymdastyrý alqasynyń ókili Táttimbet Kápuly.
Aýdandyq dene shynyqtyrý jáne sport bóliminiń jetekshi mamany Baýyr Ámirǵalınovtyń aıtýynsha, saıystyń jalpy júlde qory 500 myń teńgeni quramaq. Degdar dástúrimizdi ulyqtaıtyn birinshilik eki kúnge sozylady dep josparlanǵan.
