Úrjar óńirinde sý tasqynynyń aldyn alý qatań baqylaýda
ÚRJAR. QazAqparat - Shyǵys Qazaqstan oblysy Úrjar aýdanynda tasqynnyń aldyn-alý jumystary júrgizildi, qazir jaǵdaı turaqty, dep habarlaıdy QazAqparat tilshisi.
Búgingi kúnderi Úrjar aýdanynda kóktemgi sý tasqynynyń aldyn alý jumystary qarqyndy júrgizilýde. Aýdan ákiminiń qaýlysyna sáıkes sý tasqynyna qarsy is sharalar jospary bekitilgen.
Mamandardyń aıtýynsha, byltyrǵy kúz aılary jańbyrly bolyp, qara sýyqtyń uzaq turýy jáne qardyń juqa túsýi saldarynan jer qyrtysyna 80-90 santımetrge deıin toń qatqan. «Qazseldenqorǵaý» mekemesi qyzmetkerleriniń sózine qaraǵanda, bıylǵy jyly jaýǵan qardyń qalyńdyǵy aýdan boıynsha 33-35 cantımetr, al Tarbaǵataı taýynyń eteginde 55-60 santımetrdi qurap otyr.
«Aýdanda jobalyq syıymdylyǵy 55,3 mln m3 Qaraqol sý qoımasy jáne syıymdylyǵy 31,5 mln m3 Eginsý sý qoımasy bar. Osy sý qoımalarynyń baýraıynda ornalasqan Qońyrsháýli, Sholpan, Qaraqol, Joǵarǵy Eginsý, Eginsý aýyldyq okrýgteri qyzyl sý basý qaýpi bar jerlerde ornalasqan. Sol sebepti kóktemgi tasqyn sýǵa qarsy qatań sharalar qolǵa alynyp, tehnıkalar jumyldyrylyp, kópirler men sýaǵarlardyń asty qar men muzdan tazartyldy. Sondaı-aq, atalǵan okrýgterge ótken jyly bógetter salynyp, qap-qap qummen kúsheıtildi. Aryqtar qazyldy»,- deıdi aýdan ákimi Serik Zaınýldın.
Aıta keterligi, aýdan ákimi jaýapty mekeme basshylarymen Qońyrsháýli, Sholpan, Qaraqol, Altynshoqy aýyldyq okrýgine qarasty Aıtbaı aýyly, Joǵarǵy Eginsý, Úrjar aýyldyq okrýgterin aralady.
«Byltyr sý tasqynyna qarsy atqarylǵan sharalardyń arqasynda aýdan boıynsha jaǵdaı turaqty. Adam shyǵyny, mal shyǵyny joq» deıdi ákim.
Jalpy aýdanda tasqynnyń aldyn alý qatań baqylaýda. Aýdan ákiminiń qabyldaý bóliminde jáne tótenshe jaǵdaılar bóliminde 24 saǵattyq kezekshilik uıymdastyrylǵan. 
