Úrjar aýdanynyń shalǵaı aýylynda robottehnıka kabıneti ashyldy
ÚRJAR. QazAqparat - Shyǵys Qazaqstan oblysy Úrjar aýdanynyń shekara shebinde jatqan Qaratal aýylynda robottehnıka kabıneti ashyldy, dep habarlaıdy QazAqparat tilshisi.
Elbasymyzdyń «Rýhanı jańǵyrý» baǵdarlamasy aıasyndaǵy «Meniń mektebim» jobasy boıynsha ashylǵan kabınettiń quny 5765000 teńgeni quraıdy. Aıta keterligi, robotty tehnıka kabınetin Qaratal aýylynda 1984-1994 jyldary aralyǵynda kolhoz basshysy bop qyzmet etken Júnisov Baýyrjan Esimulynyń urpaqtary tartý etken.
«Baýyrjan Esimuly Qaratal orta mektebiniń irgetasynyń qalanýyna birden bir úles qosyp ketken azamat. «Áke kórgen oq jonar» demekshi, ákesiniń basqan topyraǵyna urpaqtarynyń qamqorlyq jasaýy jomarttyqtyń belgisi dep bilemiz. Mine, aýylymyzdyń bilim ordasyna zamanaýı kabınettiń tolyq jabdyqtaryn syıǵa tartyp otyr. Aýyldyń bolashaǵy - eldiń bolashaǵy. Bul mektep oqýshylary úshin jasalǵan úlken qamqorlyq dep bilemiz», - deıdi Qaratal aýyldyq okrýginiń ákimi Qaıyrhan Noǵaev.
Robottehnıka kabınetin Baýyrjan Esimulynyń uly Ernur Júnisov tabys etti. Robotty tehnıka kabıneti LEGO Mindstorms EV3 Education robot jıyntyqtarymen, kabınet jıhazdarymen jáne Lenovo noýtbýkterimen jabdyqtalǵan.
Zamanaýı qurylǵyny tartý etken Júnisovter áýletine qarataldyqtar sheksiz alǵys aıtty.
