Urys-kerisi kóp otbasynda balanyń tili kesh shyǵady – psıholog-defektolog

ALMATY. QazAqparat - Balanyń sóıleýiniń damýy entsefalıt, menıngıt syndy juqpaly aýrýlardan, ımmýnıtetti álsiretetin uzaqmerzimdi aýrýlar sebebinen keshigýi múmkin. Tuqym qýalaıtyn faktorlar da kezdesedi. Bul týraly Almaty Óńirlik kommýnıkatsııalar qyzmetinde ótken brıfıngide psıholog-defektolog Ásel Saǵadatova aıtty, dep habarlaıdy QazAqparat tilshisi.

«Balanyń tili kesh shyǵýynyń sebebi otbasynda qarym-qatynas mádenıeti qalyptaspaǵan jaǵdaıda bolýy múmkin. Sondaı-aq, pedagogıkalyq nemquraılylyq, nemese bala jıi urys-keristerdi baıqasa nemese ata-anasy oǵan aıqaılasa, onda ol stresske ushyraıdy, bul sóıleýdiń damýyn tejeýi múmkin», - dedi Ásel Saǵadatova.

Sondaı-aq balaǵa shamadan tys qamqorlyq kórsetý de bala tiliniń kesh shyǵýyna ákelýi múmkin.

Logoped, defektolog, psıholog Zlata Salkına sońǵy ýaqytta ata-analar túzetý ortalyqtary men keńselerine jıi kómek surap kele bastaǵanyn aıtty.

«Bala sóıleýiniń kesheýildeý dıagnozyn bala aıǵaılamasa jáne únsiz júrgeninen baıqaýǵa bolady. Eger eshqandaı dybys shyǵarmasa, ýildemese, oǵan nazar aýdarý kerek. Kóbinese ata-analar bizge 3 jyldan keıin júginedi», – dedi Zlata Salkına.

Mamandar uldardyń qyzdarǵa qaraǵanda kesh sóıleıtinin rastady. Degenmen, buǵan ǵylymı dálelder joq. Zlata Salkına balalardyń sóıleýin damytýda ádis-tásilder kesheni qoldanylatynyn aıtty.

«Birinshiden, bul tártip, úzdiksiz oqý. Ekinshiden, este saqtaý, oılaý, zeıindi damytý, úshinshiden, balalardy sportqa baǵyttaý. Ádister balanyń dıagnozyna baılanysty jeke qurastyrylady. Kez kelgen maman bir apta ishinde «sóıleý negatıvızmdegi» balany sóılete alady, al eger bul medıtsınalyq buzylýlarǵa qatysty bolsa, logopedter nevropatologtarmen jumys isteıdi. Al bul jumys tipti jyldarǵa sozylýy múmkin», - dedi ol.