Urylardy ózi ustamaq bolǵan qarııa ólip qala jazdady
SEMEI. QazAqparat - 80 jastaǵy semeılik qart urylardy ustaımyn dep ajal qusha jazdady, dep habarlaıdy QazAqparat tilshisi.
Oblystyq polıtsııa departamentiniń habarlaýynsha, oqıǵa mamyr aıynyń aıaǵynda bolǵan. Ushty-kúıli joǵalǵan 3 bas torpaǵyn izdep shyqqan qarııa bir torpaqty aǵash arasyna baılaýly turǵan jerinen taýyp alady. Urylardyń isi ekenin túsingen ol polıtsııa shaqyrýdyń ornyna úıden myltyq ákelip, urylardy tasada kútken. Bul oıyn kúıeý balasyna telefonmen aıtpaǵanda oqıǵa qaıǵyly aıaqtalýy da múmkin edi. Kóp kúttirmeı urylar da keledi. Baılaýly torpaqty ekeýlep kólikke tıegeli jatqanda qarııa olardan tapjylmaýdy talap etedi. Óziniń qur qol emes ekenin uqtyrý úshin áýege bir ret oq atady. Dánikken urylar bul eskertýge qulaq aspastan, «ońaı oljanyń» qamyna kirise bergen. Ashý qysqan qarııa osy kezde urlardyń birin aıaqtan atqan. Qylmyskerlerdiń biri dereý qarttyń qolyndaǵy myltyqty alyp, ózin ólimshi etip sabaǵan. Bul kezde qarııanyń kúıeý balasy polıtsııamen birge oqıǵa ornyna jetip, qos ury qylmys ústinde qolǵa túsedi.
«Qazir 44 jáne 57 jastaǵy eki kúdiktige qarsy bótenniń múlki men adam urlaýǵa árekettengeni úshin qylmystyq is qozǵalyp jatyr. Azamattarǵa urlyq ústinen túsken jaǵdaıda ózdiginen áreket etpeı, polıtsııa qyzmetkerlerine júginý kerektigin eskertemiz», - delingen departamenttiń baspasóz qyzmeti taratqan aqparatta.
