Urylar bir úıir jylqyny Qostanaıdan Reseıge aıdap ketken - ІІD
QOSTANAI. QazAqparat - Qostanaı oblysynyń ákimi Arhımed Muhambetov mal urlyǵynyń aldyn alýǵa baılanysty atqarýshy organdarǵa tapsyrma berdi, dep habarlaıdy «QazAqparat» HAA tilshisi.
Mal urlyǵynyń dendep ketýi oblys turǵyndaryna aıtarlyqtaı qıyndyq týǵyzýda. Oblystyq ІІD bastyǵynyń orynbasary Bolatbek Jumaǵalıevtiń aıtýynsha, jyl basynan beri mal urlyǵymen aınalysyp júrgen 9 qylmystyq top ustalǵan. Olar 44 márte urlyq jasaǵan.
«Qańtar aıynan bastap óńirde 538 mal urlandy. Olardyń 215-i nemese 40 paıyzdaıy ıelerine qaıtaryldy. Qalǵan qylmystardyń betin ashý múmkin bolmaı tur. Sondyqtan turǵyndarǵa ózderiniń túlikterine GPS-qurylǵy ornatýǵa keńes beremiz. Bul óte qymbat emes, qoljetimdi baǵada satylady», - dedi Bolatbek Jumaǵalıev.
Osy jyldyń qyrkúıek aıynda Denısov aýdanynyń Sınegorsk aýylynda «Prostory» JShS-na tıesili 47 jylqy urlandy. Shyǵyn kólemi - 8,4 mln teńge. Jedel-iz kesý sharalary barysynda jylqylardyń Reseıge ótip ketkeni anyqtaldy. Urylar Chelıabi oblysynyń Varnenskıı aýdanyna aıdap alyp ketken. Osyndaı jaǵdaı Jangeldın aýdanynyń Qalam-Qarasý aýylynda da boldy. Aımaq basshysy Arhımed Muhambetov mal urlyǵyna atústi qaraýǵa bolmaıtynyn aıtyp, jergilikti polıtsııa men atqarýshy bılik organdaryna tıisti sharalardy qabyldaý kerektigin tapsyrdy.
«Jalpy, shalǵaı jatqan eldi mekenderdegi urlyq-qarlyq jergilikti atqarýshy bıliktiń salǵyrttyǵynan bolady. Aýylda shoǵyrlanyp jatqan fabrıka, zaýyttar joq. Basty kiris kózi - mal sharýashylyǵy. Jergilikti ákimder kez kelgen qojalyqtyń jaǵdaıyn biledi. Maldyń qaı jerde jaıylatyny da anyq. Jańaǵy «Prostory» JShS-ny mysalǵa alaıyq. Shyǵyn kólemi 8,4 mln degenmen kelispeımin. Sebebi, sol urlanǵan jylqylardyń barlyǵy 200 myńnan turmaıdy. Odan da qymbat. Taǵy da eskertemin, sharýa qojalyqtaryna GPS-qurylǵylardyń paıdasyn túsindirińizder. Bul baǵytta polıtseılermen birigip, jumys isteý kerek. Mal urlyǵymen kúres baǵytyndaǵy is-sharalardy kúsheıtińizder», - dep tapsyrdy ákim.
Oblysta Qostanaı, Denısov, Áýlıekól, Taran aýdandary men Arqalyq qalasynda mar urlyǵy kóbeıgen. Qylmystyń aldyn alý sharalarynyń biri - chıp ornatý. Mamandar mal sharýashylyǵy ıelerine tańbalaýdyń dástúrli ádisterimen birge elektrondy chıpti qoldanýǵa keńes beredi. Chıppen qamtamasyz - etý maldyń sanyn baqylaý múmkindigi, sebebi chıpti syrǵa sekildi alyp tastaý múmkin emes. Bir sózben aıtqanda, bul - janýardyń pasporty. Iesi úıinde otyryp, túlikteriniń baǵyt-baǵdaryn baqylap otyrady.
