Ýrýgvaıdaǵy prezıdent saılaýynda oppozıtsııanyń kandıdaty Orsı jeńiske jetti

ASTANA. KAZINFORM — Oppozıtsııalyq «Keń maıdan» ortalyq-solshyl koalıtsııasynyń kandıdaty ıAmandý Orsı Ýrýgvaıdaǵy prezıdenttik saılaýdyń ekinshi týrynda jeńiske jetti, dep habarlaıdy TASS aqparat agenttigi. 

Buǵan Saılaý soty saılaý ýchaskeleriniń 81,26 paıyzynyń málimetterin óńdegennen keıin shyǵarǵan daýystardy sanaý qorytyndylary dálel.

Orsıge 942 470 saılaýshy daýys berdi. Onyń qarsylasy, basqarýshy ortalyq-ońshyl Ulttyq partııanyń kandıdaty Alvaro Delgadony 898 767 adam qoldady.

Delgado saılaýdaǵy jeńilgenin moıyndap, qarsylasyn quttyqtap úlgerdi. Orsıdi jeńisimen Ýrýgvaıdyń qazirgi prezıdenti Lýıs Lakale Poý da quttyqtady.

2015-2024 jyldary Kanelones departamentiniń meri qyzmetin atqarǵan Orsı Ýrýgvaıda sońǵy jyldary kúsheıgen qylmyspen kúresti jáne esirtkiniń el arqyly tasymaldanýyn óziniń basym baǵyttarynyń biri dep ataıdy.

Ýrýgvaıdyń burynǵy prezıdenti Hose Mýhıka qoldaıtyn saıasatker sonymen qatar jańa jumys oryndaryn ashýǵa jáne tabysy tómen jumysshylardyń jalaqysyn ósirýge ýáde berip otyr.

Syrtqy saıasatta ol aımaqtyq uıymdar, sonyń ishinde Ońtústik Amerıkanyń Ortaq naryǵy («Merkosýr») sheńberindegi ıntegratsııalyq úderisterdi jedeldetý qajettiligin basymdyq retinde kórsetedi.

Saılaý naýqany kezinde Orsı Venesýela prezıdenti Nıkolas Madýro úkimetin avtorıtarlyq dep atap, 28 shildede Bolıvarııa Respýblıkasynda ótken prezıdenttik saılaýda daýystardy sanaýdyń ashyqtyǵyna kúmán keltirdi. Onda Madýro jeńiske jetken. Ýrýgvaıdyń jańadan saılanǵan prezıdentiniń ınaýgýratsııasy 2025 jyldyń 1 naýryzynda ótedi.

Eske salsaq, buǵan deıin Dımashtyń áni alǵash ret Ýrýgvaı radıosynda shyrqalǵany habarlandy.