Latyn Amerıkasynda evtanazııany birinshi bolyp Ýrýgvaı zańdastyrdy
ASTANA. KAZINFORM — Ýrýgvaı parlamenti evtanazııany zańdastyrý týraly zańdy maquldady. Ol endi Latyn Amerıkasynda bul tájirıbeni zańdastyrǵan birinshi el boldy, dep habarlaıdy AP News.
Bastamany 31 senatordyń 20-sy qoldap daýys berdi, tómengi palata qujatty tamyz aıynda maquldady.
Zań medıtsına qyzmetkerlerine «adam tózgisiz azap» týdyratyn jazylmaıtyn dertke shaldyqqan naýqastardyń ótinishi boıynsha evtanazııa jasaýǵa ruqsat beredi. Bul rette naýqas áreket qabileti bar jáne óz sheshimin belgilengen tártipte rastaýy tıis.
Eýropa men AQSh-taǵy uqsas normalardyń aıyrmashylyǵy, Ýrýgvaı zańy patsıenttiń «ómir súrý uzaqtyǵyn» shektemeıdi jáne suraý men protsedýra arasyndaǵy kútý kezeńin talap etpeıdi. Sonymen birge kámeletke tolmaǵandardyń mundaı áreketterge qatysýyna tyıym salynady.
Zań qabyldanbas buryn 5 jyldan astam ýaqytqa sozylǵan uzaq talqylaý bolǵan, sondaı-aq oǵan Katolık shirkeýi qarsylyq tanytqan.
El vıtse-prezıdenti Karolına Kosse zańnyń qabyldanýyn tarıhı qadam dep atap, onyń buǵan deıin bir jynystylar nekesin, túsik jasatýdy jáne marıhýana qoldanýdy zańdastyrǵan Ýrýgvaıdyń aımaqtaǵy eń progressıvti elderdiń biri retindegi bedelin nyǵaıta túsetinin atap ótti.
Eske sala ketsek, mamyr aıynda frantsýz depýtattary evtanazııa týraly zań jobasyn maquldady.