Ursysatyn ýaqyt emes – vıtse mınıstr dárigerlerdi birigýge shaqyrdy

ALMATY. QazAqparat – QR Densaýlyq saqtaý vıtse-mınıstri Kamaljan Nadyrov Almaty bas sanıtarlyq dárigeriniń dárigerlerdi aıyptaýyna qatysty pikir bildirdi, dep habarlaıdy QazAqparat tilshisi.

Qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova dárigerler koronavırýs sımptomymen jumysqa kelip júrdi dep aıyptaǵan bolatyn.

«Terrıtorııalyq taýarlar men qyzmetterdiń sapasy men qaýipsizdigin baqylaý departamentiniń qyzmeti qandaı? Osy organ qazir medıtsınalyq uıymdardyń ishindegi eń álsiz tustaryn anyqtaý kerek. Álbette, bizdiń áriptesterimizge kemshilikterdi nuqyp kórsetken jaqpaýy múmkin. Dárigerlerdiń málimdemesine qatysty qazir tekserý júrip jatyr. Jalpy, Almaty qalalyq ortalyq klınıkalyq aýrýhanadaǵy jaǵdaı, dáriger áriptesimizdiń málimdemesi zerttelip jatyr. Komıssııa shyǵarǵan qorytyndyǵa sáıkes, zańbuzýshylyqtar anyqtalsa, ol normatıvtik-quqyqtyq baza sheńberinde jazasyn alady», - dedi Kamaljan Nadyrov.

Onyń aıtýynsha, óz-ózin qurmetteıtin kez kelgen maman medıtsınalyq uıym ishinde ınfektsııa taralmaıdy dep 100 paıyz senimmen aıta almaıdy.

«Bul – nonsens. Medıtsına qyzmetkerleri qaýip tobyna jatady. Ortalyqta aýrý dárigerden patsıentke nemese patsıentten dárigerge juǵýy ábden yqtımal. Ary qaraı tizbektelip kete beredi. Bul jaǵdaıǵa túsinistikpen qaraý kerek», - dedi vıtse mınıstr.

Kamaljan Nadyrov qazir birinshi mindet – bireýdi jumystan shyǵarý emes, máseleniń sebep-saldaryn aıqyndaý ekenin aıtty.

«Áriptesterimdi eshkimdi aıyptap, urysýdy qoıa turýǵa shaqyramyn. Qazir biz bul máselege tereńdemeı, odan da birigip jumys isteýimiz kerek. El basshylyǵy men halyqtyń bizden kútip otyrǵany osy ǵana», - dedi ol.