Ýrsýla fon der Lıaıenge jańa senimsizdik votýmdary qaýpi tónip tur

ASTANA. KAZINFORM – Eýropalyq komıssııanyń tóraǵasy Ýrsýla fon der Lıaıen jazǵy demalystar aldynda Eýroparlamenttegi senimsizdik votýmynan ótken bolatyn. Alaıda ol aldaǵy aptada jańa eki daýys berýmen betpe-bet kelýi múmkin, dep habarlaıdy Euronews.

«Solshyldar» jáne «Eýropanyń patrıottary» toptary komıssııany qyzmetinen ketirýge baǵyttalǵan eki túrli senimsizdik votýmyn ázirleýde. Bul bastamalar qajetti qoldar jınalǵan soń Parlamenttiń qaraýyna engiziledi.

Reglamentke sáıkes, usynysty plenarlyq otyrysta qaraý úshin keminde ár onynshy depýtat – ıaǵnı 72 múshe qol qoıýy tıis. Qoldardyń durystyǵy tekserilgennen keıin, Parlament tóraǵasy depýtattardy dereý habardar etedi, al senimsizdikke qatysty pikirtalas 24 saǵat ishinde belgilenýi qajet.

«Solshyldar» tobynyń ókili Tomas Shennonnyń aıtýynsha, fraktsııa bastamany biraýyzdan qoldap otyr. Onyń sózinshe, komıssııa júrgizip otyrǵan saıasat jumysshylardyń quqyǵyn qurban etip, «Jasyl kelisimdi» álsiretip otyr.

Euronews málimetine qaraǵanda, EO-nyń Gaza máselesine áreketsizdigi jáne MERKOSÝR-men jasalǵan kelisim de narazylyqqa sebep bolǵan. Bul topqa «Tize búkpeıtin Frantsııa», ıspandyq «Podemos» jáne ıtalıalyq «Bes juldyz qozǵalysy» partııalary kiredi.

Qazir topta 46 depýtat bar, demek shekti daýysqa jetý úshin taǵy 26 qol qajet. Qosymsha qoldar sotsıalısterden, lıberaldardyń «Eýropany jańartý» fraktsııasynan nemese «jasyldardan» jınalýy yqtımal. Keıbir «jasyldar» depýtattary bastamany qoldaýǵa daıyn ekenin bildirdi.

Degenmen, tolyq fraktsııany ılandyrý qıyn bolǵanymen, jekelegen depýtattardy tartý yqtımal.

Aıta keteıik, bıylǵy shilde aıynda Eýroparlament Ýrsýla fon der Lıaıenge qarsy senimsizdik votýmyn qoldamaǵan edi.