Ýrsýla fon der Lıaıen: Eýropa BAÁ-ge jasalǵan shabýyldardy qatań aıyptaıdy

ASTANA. KAZINFORM — Eýrokomıssııa tóraǵasy Ýrsýla fon der Lıaıen BAÁ prezıdenti Muhammed ben Zaıd Al-Nahaıanmen aımaqtaǵy jaǵdaıdyń shıelenisýine baılanysty telefon arqyly sóılesti, dep habarlaıdy Kazinform agenttiginiń Brıýsseldegi menshikti tilshisi.

Áńgime Taıaý Shyǵystaǵy qaqtyǵystyń kúrt shıelenisýi aıasynda órbidi. AQSh pen Izraıldiń Irannyń áskerı jáne ıadrolyq nysandaryna birlesken soqqysynan keıin Tegeran Izraılge jáne Parsy shyǵanaǵynyń birneshe elderine, sonyń ishinde BAÁ-ge jappaı zymyrandyq jáne ushqyshsyz shabýyldarmen jaýap berdi.

Ámirlikterde zymyrandardyń ustalǵany týraly habarlandy, sondaı-aq Abý-Dabıge zymyran qırandylary qulady. Jergilikti bıliktiń málimetinshe, qırandydan bir adam qaza tapty. Dýbaıda jáne basqa aýdandarda jarylystar boldy. Jergilikti áýejaılar jabylyp, tótenshe jaǵdaı jarııalandy.

— Men BAÁ prezıdenti Al-Nahaııanmen sóılestim. Irannyń soqqylary men qaza tapqandarǵa baılanysty tolyq qoldaý bildirip, kóńil aıttym. Eýropa bul negizsiz shabýyldardy qatań aıyptaıdy. Olar BAÁ egemendigin óreskel jáne halyqaralyq quqyqty aıqyn buzdy. Bul Birikken Arab Ámirlikteriniń Iran men onyń senimdi ókilderiniń tarapynan zymyrandyq jáne ushqyshsyz shabýyldaryna tap bolǵan birinshi jaǵdaı emes. Eýropa óziniń aımaqtyq seriktesterimen tolyq yntymaqtasady. Men mańyzdy aımaqtyq seriktestermen qarym-qatynasymdy jalǵastyramyn, — dedi Eýrokomıssııa tóraǵasy.

Aıta keteıik, Birikken Ulttar Uıymynyń Bas hatshysy Taıaý Shyǵystaǵy áskerı shıelenisti aıyptady.