Ýrsýla fon der Lıaıen AQSh-taǵy Trampqa qarsy qarýly shabýyl týraly pikir bildirdi
ASTANA. KAZINFORM – Eýropalyq komıssııa tóraǵasy Ýrsýla fon der Lıaıen áleýmettik jelide AQSh prezıdenti Donald Tramp pen onyń jubaıy Melanııa Tramptyń, sondaı-aq Aq úı tilshileriniń keshki asyna qatysýshylardyń barlyǵynyń aman-esen ekenin bilgende jeńildep qalǵanyn jazdy, dep habarlaıdy Kazinform agenttiginiń Brıýsseldegi tilshisi.
– Saıasatta zorlyq-zombylyqqa eshqashan oryn joq. Qonaqtardyń qaýipsizdigin qamtamasyz etken polıtsııa men qutqarýshylardyń jedel áreketi úshin alǵys aıtamyn, - dep atap ótti Ý.Leıen.
Frantsııa prezıdenti Emmanýel Makron da Aq úı basshysyna qoldaý bildirdi.
– Keshe túnde AQSh prezıdentine qarsy jasalǵan qarýly shabýylǵa jol berýge bolmaıdy. Demokratııada zorlyq-zombylyqqa oryn joq. Men Donald Trampty tolyq qoldaıtynymdy bildiremin, - dep jazdy Frantsııa basshysy.
AQSh-ta qarýly adam Tramp ákimshiliginiń múshelerin nysanaǵa alǵany belgili boldy. Kúdikti – 31 jastaǵy Kalıfornııa turǵyny Koýl Allen. Kolýmbııa okrýgi polıtsııasy bastyǵynyń mindetin atqarýshy Djeff Kerrolldyń aıtýynsha, er adam baspasóz keshi ótip jatqan Vashıngton Hılton qonaqúıinde qonaq bolǵan. Onyń tirkelý ýaqyty belgisiz.
Ustalǵan adam quqyq qorǵaý organdaryna Aq úı qyzmetkerlerin atyp tastaýdy josparlaǵanyn aıtqan. Atys 25 sáýir kúni keshke Aq úı tilshiler qaýymdastyǵy keshki as kezinde bolǵan.
Quqyq qorǵaý organdarynyń málimetinshe, qarýly adam sholaq myltyqpen, tapanshamen jáne birneshe pyshaqpen qarýlanǵan. Ol jalǵyz áreket etti jáne banket zalynyń kire berisine jaqyn jerde kem degende 5-8 ret oq atty. AQSh prezıdenti men onyń áıeli Melanııa Tramp evakýatsııalandy. Qupııalyq qyzmet agenti jaraqat aldy — oq onyń saýytyna tıdi; agenttiń ómirine qaýip tónip turǵan joq.
Koýl Allen 27 sáýirde federaldy sotqa shyǵady. Kolýmbııa okrýginiń AQSh prokýrory Janın Pırronyń habarlaýynsha, oǵan atys qarýyn qoldaný jáne ofıtserge shabýyl jasaý boıynsha aıyp taǵylmaq. Tergeý barysynda qosymsha aıyptar qosylýy múmkin.
Budan buryn AQSh prezıdenti Aq úı tilshiler qaýymdastyǵynyń qabyldaýynan evakýatsııalanǵanyn jazǵan edik. Kóp ótpeı Tramp qarýly adamnyń ustalǵanyn jarııalap, keshki asty jalǵastyrýdy usyndy.
