Urpaqtyń altyn jibi: Astanada fototilshi Nurmuhammat Imamovtyń kórmesi ashyldy

Shara aıasynda Uly Otan soǵysynyń ardageri, kásibı fotoshejireshi Nurmuhammat Imamovtyń 70-ke jýyq jumysy kópshilik nazaryna usynyldy. Ekspozıtsııada qarapaıym eńbek adamynyń beınesi, jumysshy mamandyqtarynyń qadir-qasıeti men óndiris ómiri aıqyn kórinis tapqan.

Sonymen qatar 1960-1980 jyldary túsirilgen Tselınogradtaǵy tiginshi áıelderdiń sırek fotosýretteri kórmeniń mazmunyn tolyqtyrdy.

QR PІB Prezıdenttik ortalyǵynyń jetekshi sarapshysy Qanat Bóstekbaev kórmeniń tarıhı jáne mádenı mańyzyna erekshe toqtaldy. Onyń aıtýynsha, fototilshiniń eńbekteri ótken dáýirdiń shynaıy beınesin saqtap qalǵan qundy mura.

— Nurmuhammat Imamovtyń eńbekteri — ýaqytpen tildesken týyndylar. Onyń obektıvi bizdi ondaǵan jyl artqa jetelep, sol kezeńniń atmosferasyn sezinýge múmkindik beredi. Sonymen qatar bul kórme — eńbek adamdaryna degen qurmettiń kórinisi. Óıtkeni avtordyń fotosýretteri jumysshy mamandyqtarynyń mańyzyn aıqyn kórsetedi. Kórme bir aı boıy jalǵasady, ony qala turǵyndary men qonaqtary kelip tamashalaı alady, — dedi ol.

Fotohronıkashynyń uly Rınat Imamov kórmeni áke rýhyna taǵzym ǵana emes, qalanyń mádenı murasyn tolyqtyratyn mańyzdy joba dep baǵalaıdy.

— Munda ákemniń tańdaýly týyndylarymen qatar, tutas tarıh jatyr. Ásirese tigin tsehtarynan túsirilgen fotolar sol kezeńdegi tiginshi áıelderdiń eńbegin aıqyn kórsetedi. Osyndaı ıgi sharanyń mereıtoı qarsańynda uıymdastyrylýy — biz úshin úlken qurmet. Prezıdenttik ortalyq ujymyna shynaıy alǵysymdy bildiremin, — dedi Rınat Imamov.

Onyń aıtýynsha, fototilshiniń jeke arhıvi óte aýqymdy. Aldaǵy ýaqytta mereıtoı aıasynda jańa jobalar uıymdastyrylyp, Nurmuhammat Imamovtyń shyǵarmashylyq murasyn keńinen tanystyrý jalǵasady.

Aıta keteıik, buǵan deıin Prezıdenttik ortalyqta genderlik jáne otbasylyq saıasat máseleleri talqylanǵan bolatyn.