Urpaǵymyz osy referendýmnyń ıgiligin kórse eken – Ilıa Jaqanov

ATYRAÝ. QazAqparat – Atyraýda Qazaqstannyń Eńbek Eri Ilıa Jaqanov referendým ýchaskesine kelip, daýys berdi. Kompozıtor, óner zertteýshisi «Halyqtyń búgingi referendýmdaǵy tańdaýy ádil bolyp, urpaǵymyz onyń ıgiligin kórse eken» degen pikirin bildirdi, dep habarlaıdy QazAqparat tilshisi.

Qazaqstan men Qyrǵyzstannyń eńbek sińirgen qaıratkeri búgingi búkilhalyqtyq referendýmnan tys qalýdy jón kórmegen.

«Bul referendýmnyń Qazaqstan halqy úshin mańyzy óte zor. Biz – Ata Zańymyzdy erekshe qurmet tutatyn halyqpyz. Sol sebepten, daýys berý – el úshin, qoǵam úshin qajet qadam. Bul – búginimiz ben bolashaǵymyz úshin erekshe mánge ıe. Halyqtyń búgingi tańdaýy ózderi úshin ıgilikti, ádil ári ádiletti bolsa eken. Osy referendýmnyń nátıjesinde Qazaqstanymyz jan-jaqty damyp, kórkem elge aınalsa eken degen tilegim bar. Urpaǵymyz osy referendýmnyń ıgiligin kórse eken», - dedi Ilıa Jaqanov.

Aıta keteıik, Atyraý qalasynda turatyn Qazaqstannyń Eńbek Eri Ilıa Jaqanov №7 ýchaskede tirkelgen. Munda daýys berýge kelýshilerdi shubatpen kútip alady.

Eske salsaq, budan buryn Atyraý perzenthanasynda jas bosanǵan analar daýys bergenin habarlaǵan edik.