Ýrologtar 90 jastaǵy tyl ardagerine kúrdeli operatsııa jasady

Kúrdeli otany B.O Jarbosynov atyndaǵy Ýrologııa ǵylymı ortalyǵynyń dárigerleri jasady. Dárigerler 90 jastaǵy tyl ardageriniń qýyǵynan alty birdeı tas aldy.

90 jastaǵy Muqanov Igenqul zár shyǵarý júıesiniń qıyndaýy men qýyǵynyń syzdap aýrýy mazalap Ýrologııa ǵylymı ortalyǵyna kelgen. Buǵan deıin patsıent emhanalyq jaǵdaıda emdelgen. Kóptegen aýrýhana dárigerleri naýqastyń jasyn, qosymsha aýrýlaryn eskerip, Ýrologııa ǵylymı ortalyǵyna jibergen. Mundaǵy bilikti dárigerler men professorlar qarııanyń qýyǵynda tas jınalyp qalǵanyn anyqtap, 16 sáýir kúni kúrdeli operatsııa jasady.

«Operatsııany andrologııa bóliminiń dárigeri Hahazov ıAkýb ekeýimiz jasadyq. 2 saǵatqa sozylǵan operatsııa nátıjesinde naýqastyń qýyǵynan 6 tas alyndy. Kópshilikti qýyqtaǵy tastyń neden paıda bolatyny tolǵandyrady. Onyń kóptegen sebepteri bar, adenoma, qýyq moıynynyń berishtenýi, prostata beziniń isigi, túrli úrpi jaraqattary áser etýi múmkin. Adam aǵzasynda zárdiń tejelýi sekildi qubylystar baıqalyp, beli men shaby, qýyq aımaǵy aýyrady. Mundaı jaǵdaıda dereý dárigerge qaralǵan jón. Úıde ózdigimen emdelý, tek qana aýrýdy asqyndyrady. «Aýrý - astan» demekshi, tamaqtaný tártibin qadaǵalap otyrý kerektigin biz halyqqa únemi eskertemiz» - dedi qarııany emdeýshi-dárigeri, ýrolog-androlog Álıjan Qojamjarov.

Ýrologııa ǵylymı ortalyǵynda tıisti em sharalaryn qabyldaǵan qarııanyń densaýlyǵy qazir birqalypty.

Jeńis kúni qarsańynda Ýrologııa ǵylymı ortalyǵynyń ujymy atynan Basqarma basshysynyń klınıkalyq ister boıynsha orynbasary Sharafaddın Muxameduly men Andrologııa bóliminiń dárigerleri qarııany aldaǵy merekemen quttyqtap, aýrýhanadan saltanatty túrde shyǵaryp saldy.

B.O. Jarbosynov atyndaǵy Ýrologııa ǵylymı ortalyǵy Jeńis kúni qarsańynda kónekóz qarııalarǵa arnap 22 sáýir men 5 mamyr aralyǵynda Ashyq esik kúni aktsııasyn ótkizbek. Ortalyq basshylyǵy soǵys ardagerlerine jáne tylda eńbek etken jandardyń densaýlyǵyn qaraýǵa barynsha kúsh salmaq.