Úrimjiden velosıpedpen jolǵa shyqqan qazaq qyzy Astanaǵa jetti
ASTANA. KAZINFORM – Qytaıdyń Úrimji qalasynan velosıpedpen jolǵa shyqqan Búrlen esimdi 20 jastaǵy qazaq qyzy búgin Astanaǵa jetip, saparyn aıaqtady, dep habarlaıdy QazAqparat tilshisi.
Búrlen Ádiletqyzy – Shyńjań ólkesi, Dórbiljin aýdanynyń týmasy. Bıyl joǵary oqý ornyn baǵdarlama jasaqtaýshy mamandyǵy boıynsha támamdaǵan.
Ol Qazaqstan – Qytaı arasyndaǵy yntymaqtastyqty qoldaý maqsatynda saparǵa shyqqan. Qazaq qyzy 2 myń shaqyrymynan astam jol júrip, búgin Elordaǵa jetti. Alystan kelgen Búrlendi Elorda jurtshylyǵy, erekshe yqylaspen qarsy alyp, shashý shashyp, qymyz usyndy.
«Astanaǵa aman-esen jetip, sizderdi kórgenime óte qýanyshtymyn. Qarsy alyp jatqan yqylastaryńyzǵa kóp rahmet. Bul sapardy kópten beri oılastyrp júr edim. Táýekelge bel býyp, 21 shilde Úrimji qalasynan jolǵa shyqtym. Basty maqsatym – eki eldiń dostyǵyn nasıhattaý. Bıyl «Bir beldeý, bir jol» jobasyna 10 jyl tolyp otyr. Qazaqstan men Qytaı arasyndaǵy vızasyz rejım ornaǵannan beri, saıahatshylardyń sany artyp keledi. Eki el arasyndaǵy dostyq nyǵaıa bersin dep tileımin», - dedi qazaq qyzy.
Onyń aıtýynsha, kúnniń ystyǵy men joldaǵy kedergiler sapar kezinde qıyndyq týdyrǵan.
«Bul – velosıpedpen shyqqan alǵashqy saıahatym. Kúnine 100-150 shaqyrym jol júrip otyrdym. Kúnniń ystyǵy azdap qıyndyqtar týdyrdy. Qyzýym kóterilip, aýyrǵan kúnderim boldy. Áýelde jýan dóńgelekti velosıpedpen shyqqanmyn. Biraq ol baıaý júretindikten jińishke dóńgelekke aýystyrdym. Jolda tas, áınek kirip, dońǵalaǵym jarylyp, shynjyrym isten shyqqan kezder boldy. Bárin ózim jóndep aldym. Tańǵy besterde shyǵyp, túnde aıaldap otyrdym.
Joldaǵy qańǵybas ıtterden qashqan kezderim bar. Aldymnan kezdesken adamdardyń barlyǵy qoldaý bildirip, sýyn berip, tamaǵymen bólisip, kómekterin kórsetip jatyr. «Jol azabyn júrgen biledi» demekshi, bul sapar qıyndyǵy men qyzy mol, ómirimniń bir belesi retinde esteqalarlyq erekshe kúnge aınalary sózsiz. Qazaqtyń keń dalasyn kórip, kórkem tabıǵatyna tánti boldym», - deıdi Búrlen Ádiletqyzy.
Іs-sharaǵa arnaıy kelgen «Dúnıejúzi qazaqtary qaýymdastyǵy» Astana qalalyq fılıalynyń basshysy Ǵalym Úlkenbaıuly, Búrlendi jeńisimen quttyqtap, alǵyshat jáne aqshalaı sertıfıkat tabystady.
