Úrimjiden velosıpedpen jolǵa shyqqan qazaq qyzy Astanaǵa jaqyndap qaldy
ASTANA. KAZINFORM – Qytaıdyń Úrimji qalasynan velosıpedpen jolǵa shyqqan Búrlen esimdi 20 jastaǵy qazaq qyzy 2 000 shaqyrymynan astam joldy artqa tastap, Elordaǵa jaqyndap qaldy, dep habarlaıdy QazAqparat tilshisi.
Búrlen Ádiletqyzy Shynjań ólkesi, Dórbiljin aýdanynyń týmasy. Ol Qazaqstan – Qytaı arasyndaǵy yntymaqtastyqty qoldaý maqsatynda saparǵa shyqqan. Qazir Qaraǵandy oblysynyń aýmaǵynda júr. Erteń Astanaǵa jetip, «Báıterek» monýmentiniń janynda saparyna núkte qoıýdy josparlap otyr.
«Bul sapardy kópten beri oılastyrp júr edim. Táýekelge bel býyp, 21 shilde Úrimji qalasynan jolǵa shyqtym. Kóńilimde qatty alań bolmady, ózime senimdi boldym. Buıyrsa márege jaqyndap qaldym. Basty maqsatym – eki eldiń dostyǵyn nasıhattaý. Qazaqstan men Qytaı arasyndaǵy vızasyz rejım ornaǵannan beri, saıahatshylardyń sany artyp keledi. Eki el arasyndaǵy dostyq máńgilik bolsyn!», - dedi qazaq qyzy.
Onyń aıtýynsha, kúnniń ystyǵy men joldaǵy kedergiler sapar kezinde qıyndyq týdyrǵan.
«Kúnine 100-150 shaqyrym jol júrip kelemin. Kúnniń ystyǵy azdap qıyndyqtar týdyrdy. Qyzýym kóterilip, aýyrǵan kúnderim boldy. Joldaǵy qańǵybas ıtterden qashqan kezderim bar. Aldymnan kezdesken adamdardyń barlyǵy qoldaý bildirip, sýyn berip, tamaǵymen bólisip, kómekterin kórsetip jatyr. «Jol azabyn júrgen biledi» demekshi, bul sapar qıyndyǵy men qyzy mol, ómirimniń bir belesi retinde esteqalarlyq erekshe kúnge aınalary sózsiz. Qazaqtyń keń dalasyn kórip, kórkem tabıǵatyna kózim toımaı keledi», - deıdi Búrlen Ádiletqyzy.
