Urlyqtyń jasalýyna jol bergen jolserikterge aıyppul salyndy
«Shý, Dostyq kólik prokýrorlary telefon jáne basqa da jeke zattardyń urlyǵyn poıyzdarda «bıletsiz jolaýshylar» jasaıtynyn anyqtaǵan. Osyǵan kináli jolserikter ákimshilik jaýapkershilikke tartyldy. QTJ-ǵa aldyn-alý sharalaryn kúsheıtý týraly usyný engizildi», delingen habarlamada.
Bul málimeti Bas kólik prokýratýrasynyń 2019 jylǵy jumysyn qortyndylaýda jarııa etildi. Vedomstvo qylmystyq quqyq buzýshylyq jasaýǵa yqpal etken mán-jaıdy anyqtaý jumysyn kúsheıtken. 2019 jylǵy jumystyń nátıjesinde prokýratýra jáne qylmystyq qýdalaý organdary 1 112 usynym engizgen. Bul 2018 jylmen salystyrǵanda 10% -ǵa kóp.
«Osyndaı negiz boıynsha sotta 26 jeke qaýly shyǵarylyp, olardyń 13-i memlekettik aıyptaýshynyń ótinishimen qabyldanǵan. Olar boıynsha 240 tulǵa tártiptik jaýapkershilikke, 5 - ákimshilik jaýapkershilikke tartylyp, 25 qyzmetkerdiń eńbek sharty buzylǵan», delingen habarlamada. Bul sheshimdi qabyldaýǵa mynadaı faktorlar áser etken: jolaýshy men júkti tasymaldaý erejesin buzý, kúzet qurylymdaryna vedomstvolyq baqylaýdy tıisinshe júrgizbeý, beınebaqylaý qurylǵysynyń jetispeýi, jaryqtandyrýdyń joqtyǵy, «esepke alynǵan» tulǵalarǵa tıisti baqylaý jasamaýy jáne taǵy basqalar.
«Semeı kólik prokýratýrasy qylmystyq isti zerdeleý barysynda quny 60 myń teńge turatyn urlanǵan uıaly telefondy lombard 10 myń teńge nesıege kepil retinde alǵanyn anyqtady. Lombard qyzmetkeri telefonnyń ıesiniń quqyqtyq qujattyn teksermeı, qylmyskerge urlanǵan múlikti satýyna múmkindik bergen. Osy fakti boıynsha ýákiletti organ tıisti tekserý jumystaryn júrgizýde», delingen habarlamada.
Kókshetaý kólik prokýratýrasy «esepke alynǵan» tulǵaǵa tıisti túrde probatsııalyq baqylaý júrgizbegenin anyqtaldy, ıaǵnı qaýipti qylmysker 2019 jylǵy 18 jeltoqsanda túngi ýaqytta mas kúıde bir top adammen birge tonaý jasaǵan jerinde ustalǵan.
Probatsııa qyzmetiniń materıaldaryn zerdeleý barysynda bul qaýipti qylmysker osy jaǵdaıǵa deıin 12 ret ákimshilik jaýapkershilikke tartylǵany jáne taraptardyń tatýlasýyna baılanysty 5 ret qylmystyq jaýaptylyqtan bosatylǵany anyqtaldy.
Ekinshi kúdikti de menshikke qarsy birneshe ret qylmys jasaýshy (urlyq, tonaý) tulǵa retinde probatsııalyq esepte turǵan.
Qazir, kólik prokýratýrasy ishki ister organdarynyń qyzmetkerlerine qatysty qyzmettegi áreketsizdik jáne salǵyrttyq belgileri boıynsha sotqa deıingi tergep-tekserýdi tirkeý máselesi qarastyrýda.
