Urlyqtyń túbi qorlyq ekenin jastardyń sanasyna oqýshy kezden sińirýimiz kerek - Arman Berdalın
«Biz jemqorlyqqa qatysty sheneýnikterdiń basyna qara bult úıirip jatyrmyz. Biz halyqtyń arasyna shyǵyp, parany kim berip jatqany týraly suraýymyz kerek. Halyq amalsyzdan para beredi, biraq prıntsıpti túrde para bermeıtin adamdar bolady. Biz sony kóbirek nasıhattaýymyz kerek. Men memlekettik qyzmetkerlerdi aqtap alaıyn dep otyrǵan joqpyn. Biz respýblıkalyq shtabtaǵy azamattarmen Qazaqstandy eki ret aınalyp shyqtyq. Barlyq óńirge, onyń ishinde aýdandarǵa, shalǵaıdaǵy aýyldarǵa da bardyq. Sonyń ishinde jemqorlyq faktileri kóp anyqtalǵan mekemelerge bardyq. ıAǵnı, áriptesteriniń qolyna keshe ǵana kisen salynǵan ujymdarǵa baryp, jandy jerlerine tıgizip nasıhat aıttyq. Jemqorlyqpen áshkerelengen azamattardyń 1-2 aptadan keıin ákesi nemese anasy qusadan qaıtys bolǵanyn da estidik. Ólimnen uıat kúshti degendi kózben kórip otyrmyz. Eskiniń kóbi – qarııalar balasynyń ury bolǵanyna shydamaı, dúnıeden ótip ketip jatyr. Memlekettik qyzmetkerlermen kezdeskende osyndaı mysaldardy da aıtyp jatyrmyz», - deıdi Agenttiktiń Aqparattyq-aǵartýshylyq shtaby jetekshisiniń orynbasary Arman Berdalın.
Ol qazirgi tolqyndy tárbıeleı almasaq ta, kele jatqan tolqyndy tárbıeleýge tolyqqandy múmkindigimiz bar ekenin aıtty.
«Bálkim osy baǵdarlama kórermenderiniń úıinde bolashaq ákim, áldebir mekemeniń tizginin ustaıtyn azamat ósip kele jatqan shyǵar. Ár azamat eń aldymen ózin jáne otbasyn túzeıtin bolsa ǵana nátıjege jetemiz. Agenttiktiń úlken baǵyty – bilim salasymen tyǵyz jumys istep jatyrmyz. Barlyq joǵary oqý oryndarynda «Sanaly urpaq» dep atalatyn jobamyz iske asyp jatyr. Odan bólek barlyq mektepte «Adal urpaq» degen klýbtar jumys isteıdi. Keıbir adam balalarǵa jemqorlyq týraly mektepte oqytýdyń qajeti joq ekeni týraly jalań pikir aıtty. Qazirden bastap synyptasynyń qalamyn óz qaltasyna salǵan bala erteń qazynanyń qarjysyna da qol salýdan qymsynbaıdy. Tamyryn baltamen shapqandaı qylyp, urlyqtyń túbi qorlyq ekenin oqýshy kezden sanasyna sińirý kerekpiz», - deıdi ol.