Urlyq jasap, kisi óltirgen oraldyq turǵyn 13 jylǵa sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynyń 6 naýryzdaǵy úkimimen Anatolıı Trıfonov QR QK 99-baby 2-bólimi (kisi óltirý) jáne 188-baby 2-bólimimen (urlyq) aıypty dep tanylyp, 13 jylǵa bas bostandyǵynan aıyrý jazasyn qatań tártiptegi túzetý kolonııasynda óteýge sottaldy, dep habarlaıdy «QazAqparat» HAA tilshisi.
Sot talqysynda belgili bolǵanyndaı, sottalýshy 2016 jyldyń 18 qarashasynan azyq-túlik dúkenderine tereze arqyly kirip, birneshe ret urlyq jasaǵan. 14 jeltoqsan kúni sońǵy joryqtan keıin araq satyp alyp, ózi ár túrli jumys jasaıtyn «Dorojnyı» meıramhanasyna kelgen. Osynda ózimen turmystyq bólmede birge turatyn kúzetshi Qalmuqanovpen birge araq ishken. Sonyń barysynda ekeýiniń arasynda talas týyndaǵan. Jábirlenýshi buryn birneshe ret sottalǵan Trıfonovtyń bas bostandyǵynan aıyrý ornynda er adamdarmen jynystyq qarym-qatynasta bolǵanyn aıtqan. Bul sózderden keıin Trıfonov Qalmuqanovty edenge jyǵyp salyp, keýde tusyna 10 márte pyshaq jumsaǵan. Marqum sol jerde kóz jumǵan.
Sottalýshy sondaı-aq Qalmuqanovtyń týystaryna moraldyq ótemaqy retinde 1,5 mln. teńge tóleýi tıis.
Sot úkimi zańdy kúshine engen joq.
