Urlyq, tonaý jáne bopsalaýshylyq jasaǵany úshin qylmystyq jaýapkershilik bastalatyn jasty 14-ten 16-ǵa deıin ulǵaıtý kózdeledi
ASTANA. Maýsymnyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine balanyń quqyqtaryn qorǵaýdy qamtamasyz etý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Endi qujat Parlament Senatyna jiberiledi, dep habarlaıdy QazAqparat.
Zań jobasynyń maqsaty kámeletke tolmaǵandardyń quqyqtaryn, bostandyqtaryn, múddelerin qorǵaý deńgeıin arttyrý bolyp tabylady. Sonymen birge, qujat aıasynda balanyń quqyqtaryn qorǵaý men kámeletke tolmaǵandar arasynda quqyq buzýshylyqtardyń aldyn alýǵa baǵyttalǵan quqyqtyq sharalar júıesin keńeıtý kózdeledi. Osyǵan oraı, zań jobasynda urlyq, tonaý jáne bopsalaýshylyq jasaǵany úshin qylmystyq jaýapkershilik bastalatyn jasty 14-ten 16-ǵa deıin ulǵaıtý kózdeledi. Kámelettik jasqa tolmaǵan balany jezókshelikpen aınalysýǵa tartqany úshin jaýaptylyqty qataıtý kózdeletin bap ta qamtylyp otyr. Budan bólek kámeletke tolmaǵan balanyń erotıkalyq sıpattaǵy zattar men materıaldardy satýyna tyıym salynady. Kámeletke tolmaǵandardyń jynystyq tıispeýshiligine qarsy qylmys jasaǵan adamdardyń - ata-analardyń, pedagogtardyń ne on alty jasqa tolmaǵan adamdardy tárbıeleý jónindegi mindetter zańmen júktelgen ózge de adamdardyń, sondaı-aq olar birneshe ret jasalǵanda qylmystyq jaýaptylyǵynyń sharalary edáýir kúsheıtiledi.
Qujatta sondaı-aq kámeletke tolmaǵandardy olardyń densaýlyǵyna zııan tıgizetin aýyr jumystarǵa nemese olardyń bilim alýyna kedergi keltiretin jumystarǵa tartýǵa tyıym salynady. Zań jobasy boıynsha damyǵan elderdiń balalar quqy boıynsha tájirıbeleri zerdelenip, eskerilgen.
