Urlanǵan telefondardy shetel asyryp otyrǵan qylmystyq top ustaldy
ALMATY. QazAqparat - Almaty polıtsııasy urlanǵan telefondardy shetel asyryp otyrǵan qylmystyq topty áshkereledi, dep habarlaıdy QazAqparat tilshisi qalalyq Polıtsııa departamentiniń baspasóz qyzmetine silteme jasap.
Arnaıy operatsııa eki jaqta jasaldy. Polıtsııa «Almaty-Bishkek» tas jolynyń 62-shaqyrymynda, qaladan shyǵa beriste «Mersedes S500» kóligin toqtatqan. 32 jastaǵy Qyrǵyzstan azamatyn tintý kezinde polıetılen paketke salynǵan 38 mobıldi telefon tabyldy.
«Mámile «Almaty-Bishkek» tas jolynda bolǵan. «Megataý» saýda ornynda satýshy bolyp jumys isteıtin 24 jastaǵy boıjetken telefondardy «áriptesine» birneshe mınýt buryn tabystaǵan bolyp shyqty. Áıeldiń ózi Almatyda úıine qaıtyp kele jatqanda ustaldy. Barlyq telefon buryn qoldanysta bolǵan gadjetter. Olardyń bárinde qorap bolmaǵan. Qujattary joq. Ol bul telefondardy kók bazardaǵy satýshy áıelden 4 myń AQSh dollaryna satyp alǵanyn aıtqan. Ustalǵan jigit telefondardy Bishkekte satyp jibergisi kelgen. Ustalǵan kezde kelinshek te óziniń eski telefondardy satqanyn moıyndady», - dedi qalalyq PD basqarma basshysy Esen Ysqaqov.
Polıtsııanyń paıymdaýynsha, qylmystyq sındıkattyń shemasy qarapaıym bolǵan.
«Áıel urlanǵan telefondardy satyp alyp otyrǵan. Sosyn bul gadjetter joǵary baǵada Qyrǵyzstanǵa satylyp otyrǵan», - dedi ol.
Qazir atalǵan derekke baılanysty QR QK 196-baby boıynsha sotqa deıingi tergeý jumystary júrip jatyr.
24 jastaǵy áıeldiń urlanǵan telefondardy kimnen satyp alyp otyrǵany da anyqtaldy. Aldaǵy ýaqytta ǵımarat ishinde urlanǵan zattyń satylýyna ruqsat bergen saýda úıiniń admınıstratorynyń áreketine quqyqtyq baǵa beriletin bolady.
«Sonymen qatar, urlanǵan zattardyń shynaıy ıeleri izdestirilip jatyr. Bul zattardyń ishinen eki zattyń ıesi tabyldy. Olardyń biri - balaly áıel bolsa, ekinshisi JOO stýdenti óz zatyn tanydy», - dedi polıtsııanyń baspasóz qyzmetinen.
