Urlanǵan telefondar ázirge buǵattalmaıdy - Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaevtyń aıtýynsha, jaqyn arada uıaly telefondardy tirkeýge qatysty arnaıy buıryq shyǵady. Alaıda, búginde júzdegen IMEI-kodtardyń uqsas bolýy atalǵan sharalardy júrgizýge qolbaılaý bolyp otyr, dep xabarlaıdy QazAqparat tilshisi.

"Uıaly telefondardy tirkeý qajet. Sebebi búginde osy salada urlyq kóp. Al uıaly telefondardy tirkeıtin bolsaq, urlanǵan kez kelgen telefondy IMEI-kod arqyly buǵattaýǵa bolady. Ol úshin abonent aryz beredi. Al uıaly baılanys kompanııasy onyń telefonyn buǵattap tastaıdy. Sonda urlyqtyń kólemi de azaıady. Sebebi telefondy urlaǵan adam ony paıdalana almaıdy", - dedi Abaev búgin xalyq aldyndaǵy esep berý kezdesýinde.

Mınıstrdiń sózine qaraǵanda, osy salada bir kedergi bar. Ol - júzdegen IMEI-kodtyń uqsas bolýy. "Qazir Qazaqstanǵa kelip jatqan 200 uıaly telefonnyń bir IMEI-kody bar. Bir telefon urlansa, barlyq apparattardy buǵattaýǵa týra keledi. Osy jaǵynan qıyndyqtar týyndap jatyr. Degenmen, biz osy saladaǵy jumysty jalǵastyratyn bolamyz. Sonda uıaly telefondar urlyǵy tyıylady. Bul jumysty bıyl bolmasa da, bir jarym jyldyń ishinde aıaqtaımyz dep oılaımyn", - dep atap kórsetti mınıstr.

Abaevtyń aıtýynsha, qazirgi kezde uıaly telefondardy IMEI-kod arqyly tirkeýdiń erejesi ázirlenip jatyr.

"Atalǵan erejeler eki-úsh aptanyń ishinde aıaqtalady dep oılaımyn. Osydan keıin IMEI-kodtar boıynsha urlanǵan telefondardyń bazasy qurylady (...) Ázirshe uıaly telefondar buǵattalmaıdy. Alaıda urlanǵan telefonnyń IMEI-kody qaıtalanbasa, onda buǵattaıtyn shyǵarmyz", - dedi ol jýrnalısterge bergen suxbatynda. 

Aıta keteıik, qazirgi kezde qazaqstandyqtardyń qoldanysynda 30 mln-ǵa jýyq uıaly telefon bar.