Urlanǵan munaıdy satýdan qylmyskerler mıllıondaǵan somada zańsyz tabys alady

 Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.

Máselen, resmı ókildiń aıtýynsha, Batys Qazaqstan oblysynda shartty túrde 4 jylǵa bas bostandyǵynan aıyrý jazasyna  Kajıpanov sottalǵan. Ol  «Qarshyǵanaq óńdeý kesheni - Ulken Shaǵan - Atyraý» qubyrynan 18,7 mln. teńge somasynyń 288 tonna shıki munaı urlap, birneshe kásiporyndarǵa jalǵan qujattar arqyly satqan. Sondaı-aq Qyzylorda oblysynda «Qyzylorda-Alataý» JShS-niń dırektory Ótepbergenovke qatysty is sotqa tapsyryldy. Ol 2011 jylǵy tamyz-jeltoqsan aralyǵynda «Qazaly» stansasynan «Armavır ImpEx Oil» jáne «Sary-Arqa 2007 KZ» JShS-ine zańsyz jolmen satyp alynǵan 789 tonna munaı qaldyqtarynyń qospalaryn satyp, ol úshin 46,5 mln. teńge alǵan dep aıyptalýda.

«Qyzylorda oblysynda «Kerýen Modýs Treıd» JShS dırektoryna qatysty is te  sotqa tapsyryldy. Ol 2010 jylǵy qarashada Qyzylorda stansasynan Qarataý stansasyna suıyq janarmaı retinde tirkelgen quny 45 mln. teńgeni quraıtyn 649 tonna shıki munaımen toltyrylǵan 11 vagon-tsısternany jibermekke árekettengen dep aıyptalýda», - dedi ol.