Urlanǵan munaı ónimderi jasyryn tsehta óńdeledi - Qarjy polıtsııasy
ASTANA. 17 mamyr. QazAqparat - Elimizde urlanǵan munaı ónimderi jasyryn tsehta óńdeledi. Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.
«Qarjy polıtsııasy organdarynyń jedel-tergeý qyzmeti kórsetkendeı, urlanǵan munaı ári qaraı satý maqsatynda jasyryn shaǵyn tsehtarda óńdeledi», - dep atap ótken onyń aıtýynsha, Qyzylorda oblysynda jedel-izdestirý sharalardyń nátıjesinde Qyzylorda-Jezqazgan trassasynyń 53 shaqyrymynda ornalasqan jasyryn shaǵyn tseh anyqtalǵan. Onda tıisti qujattary joq shıki munaıdy óńdeý jáne saqtaý júrgizilgen. Tekserý barysynda 10 tonna shıki munaı anyqtalǵan. «Atalǵan fakt boıynsha Shohtaev shartty túrde 1 jylǵa bas bostandyǵynan aıyrý jazasyna kesildi», - dedi ol.
Sonymen qatar onyń atap ótýinshe, osy oblysta shıki munaıdy zańsyz óndirý boıynsha jasyryn taǵy bir shaǵyn tsehtiń qyzmeti áshkerelendi. «Bul tsehtan qujatsyz 15 tonna shıki munaı anyqtaldy. Osy fakt boıynsha Toqsanbaevqa qatysty qozǵalǵan qylmystyq is raqymshylyq aktisine baılanysty qysqartyldy»,- dedi M.Jumanbaı.
