Urlanǵan kólikti izdeý kezeńinde ıesine salyq salynbaıdy

NUR-SULTAN. QazAqparat – Kóligi urlanǵan azamattar kólik salyǵyn tóleýge mindetti me?Memlekettik kirister komıtetiniń mamandaryna Ortalyq kommýnıkatsııalar qyzmetinde osyndaı saýal qoıyldy, dep habarlaıdy QazAqparat tilshisi.

Jeli qoldanýshysynyń aıtýynsha, ıeligindegi kólik 2016 jyldyń mamyr aıynan beri izdeýde eken. Bir kúni sol kóliktiń salyq qaryzy jınaqtalyp, burynǵy ıesi retinde moınyna iline me dep alańdaıtynyn aıtady.

Saýalǵa jaýap bergen Memlekettik kirister komıtetiniń óndiristik emes tólemderdi, jeke tulǵalardy ákimshilendirý jáne arnaıy salyq rejımi departamentiniń dırektory Azamat Sadyqov urlanǵan kóliktiń salyǵyn tólemeý úshin oqıǵany der kezinde habarlap, faktini dáleldeıtin qujattardy pysyqtaý mańyzdy ekenin aıtty.

«Kólik quraldaryn tirkeý salasyndaǵy salyq organyna beriletin is qozǵaý faktisin nemese kúnin rastaıtyn málimetter izdestirý kezeńinde kólik quraldaryna salyq tóleýden bosatý úshin negiz bolyp tabylady. Osylaısha, eger urlyq faktisin dáleldeıtin málimetter bolsa, onda salyq eseptelmeıdi», - dedi komıtet ókili.

Eske salsaq, atalmysh brıfıngige kólik salyǵy qandaı ólshemder boıynsha esepteletini aıtylǵan bolatyn.