Urlanǵan bala 40 jyldan keıin anasymen tabysty
ASTANA. QazAqparat - 1973 jyly Chılıdiń 19 jastaǵy turǵyny Nellı Raısqa dárigerler dúnıe esigin endi ashqan perzentiniń shetinep ketkenin habarlaǵan edi. Arada 41 jyl ótkende balasynyń aman ekenin bilgende esinen tanyp qala jazdady. Naqtyraq aıtqanda, amerıkalyq azamat oǵan hat jazyp, balasy ekenin habarlaıdy.
Qyzyq bolǵanda, ózin bosandyrǵan dárigerlerdiń sózine senip qalǵan áıel sharanany kórsetýdi talap etpegen edi kezinde. Ol ol ma, sharananyń shetinegeni jaıynda kýálikti de talap etpegen.
«Jasym 40-qa kelgende týǵandarymdy izdeýge kiristim. Meni asyrap alǵan ata-anam ósirip-jetkizgenin biletinmin. Bala kezimde maǵan meniń týǵan jerim Chılı ekenin aıtqan bolatyn»,- dedi AQSh-tyń Vashıngton shtatyna qarasty Takoma qalasynyń turǵyny Trevıs Trole. «Ógeı áke-sheshem meni balalar úıinen asyrap alǵandaryn aıtqan bolatyn. Onda qalaı tap boldym, eshkim bilmeıdi. Uzaq ýaqytqa sozylǵan izdestirý jumystarynan keıin áleýmettik jeliden ótken ǵasyrdyń 60-90 jyldar aralyǵynda Chılıde balalardyń kóptep joǵalǵany týraly aqparatqa keziktim. Olardyń sany birneshe júz bolatyn. Olardy sheteldikterge satqan nemese balalar úıine ótkizgen»,- dedi amerıkalyq azamat aǵynan aqtarylyp. «Chılıden urlanǵan balalardy ata-anasymen qaýyshtyratyn qaýymdastyqpen "Feısbýk" áleýmettik jelisinde tanysýdyń sáti tústi. Olarǵa ózim jaıyndaǵy aqparattardy berdim. Týra bir aıdan keıin olar maǵan týǵan anamnyń baılanys deregin taýyp berdi», - dedi ol sózin sabaqtap. Eki balanyń ákesi atanyp úlgergen ol Chılıde óziniń úsh inisi men eki qaryndasyn baryn biledi. 61 jastaǵy Nellı Raıs 40 jyldan keıin tabylǵan balasyn AQSh-tan Chılıge kóshirip alatynyn jetkizdi, dep jazady islam.kz.
