Urlaǵan kólikti aýylynda minip júrgen stýdentter ustaldy
KÓKShETAÝ. QazAqparat - Aqmola oblysynda bireýdiń kóligin aıdap áketken kolledj stýdentteri ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimeti boıynsha, mamyr aıynyń basynda Stepnogorsk qalasynyń PB kezekshilik bólimine tal túste VAZ-2107 kóliginiń urlanǵany týraly habar túsken. Kólik ıesiniń sózinshe, ol avtomobılin úıiniń aýlasyna qoıǵan. Keıin arada biraz ýaqyt ótken soń onyń úshti-kúıli joǵalǵanyn baıqaıdy.
Kólik urlanǵany týraly Aqmola oblysynyń polıtsııa bólimshelerine habarlandy. Nátıjesinde Şýchınsk qalasynyń polıtsııa qyzmetkerlerine jedel-izdestirý sharalary kezinde Gýlıaıpole aýylynda bóten kóliktiń júrgeni týraly aqparat túsedi. Júrgizýshi tanystaryna kólikti «ózime aıdap ákeldim» dep aıtqan. Keıin atalmysh avtokóliktiń izdeý jarııalanǵan VAZ-2107 ekeni anyqtalyp, júrgizýshi ustalady.
«Tekseris barysynda belgili bolǵandaı, kólik urlaǵandar Stepnogorsk qalasyndaǵy kolledjde oqyp júgen 2001 jáne 1999 jyly týǵan stýdentter. Olar qylmystaryn tolyq moıyndady. Kúdiktilerdiń ústinen QR QK 200 babynyń 2 bóligi (avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý) boıynsha is qozǵalyp, sotqa deıingi tergeý amaldary júrgizilýde. Atalmysh sanktsııa boıynsha 3 jylǵa deıin bas bostandyǵynan aıyrý jazasy qarastyrylǵan», dep atap ótti vedomstvonyń baspasóz qyzmetindegiler.
