Urlaǵan altyn buıymdaryn satyp, kólik alǵan - Qyzylorda
QYZYLORDA. QazAqparat - Belgisiz bireý Shıeli kentindegi bazarlardyń birinde ornalasqan «Aqjan» áshekeı buıymdaryn satatyn dúkenge kirip, ár túrli úlgidegi altyn alqalaryn urlap, oqıǵa ornynan boı tasalaǵan.
Saldarynan dúken ıesine jalpy quny 3 455 000 teńge múliktik shyǵyn keltirilgen. Bul týraly QazAqparat tilshisi oblystyq ІІD silteme jasap habarlady.
Polıtsııa qyzmetkerleriniń júrgizgen jedel-izdestirý sharalary barysynda qylmysty jasady degen kúdikpen Aqjarma aýylynyń 1982 jyly týylǵan turǵyny ustalyp, Shıeli AІІB ýaqytsha ustaý oqshaýlaǵyshyna qamaldy. Kúdiktiniń barlyq altyn buıymdardy satyp jiberip, túsken aqshaǵa avtokólik satyp alǵandyǵy anyqtaldy.
Qazirgi tańda atalǵan azamatqa qatysty Qazaqstan Respýblıkasy Qylmystyq kodeksiniń 188-baby 3-bóligimen qylmystyq is qozǵalyp, sotqa deıingi tergep-tekserý jumystary júrgizilýde.
