«Úrker» ulttyq syılyǵyna ótinim qabyldaýdyń aıaqtalýyna 5 kún qaldy

NUR-SULTAN. QazAqparat - Jýrnalısterge arnalǵan «Úrker-2019» ulttyq syılyǵyna ótinim qabyldaý 20 maýsymda aıaqtalady, dep habarlaıdy QazAqparat tilshisi.

Buǵan deıin habarlaǵanymyzdaı, syılyqqa ótinim 25 mamyrdan qabyldana bastaǵan edi. Ulttyq syılyq baspa, radıo, ınternet-jýrnalıstıka salasyndaǵy úzdik jetistikteri úshin beriledi. Atalǵan syılyq óńirlerdegi mýltımedıalyq jýrnalıstıkany damytýǵa yqpal etý, jýrnalıstıka mártebesin kóterý, kásibı standarttar men krıterıılerdi bekitý, qoǵamnyń azamattyq belsendiligin arttyrýǵa baǵyttalǵan.

Syılyqtyń quryltaıshysy jáne uıymdastyrýshysy - QR Aqparat jáne qoǵamdyq damý mınıstrligi. Bıyl ótinishter jyldyń úzdik fotografııasy, jyldyń úzdik reportajy, jyldyń úzdik analıtıkalyq materıaly, jyldyń úzdik jýrnalıstik zertteýi, jyldyń úzdik suhbaty, Qazaqstan týraly jyldyń úzdik tanymdyq materıaly, jyldyń úzdik radıostantsııasy, jyldyń úzdik aqparattyq portaly, jyldyń úzdik gazeti, jyldyń úzdik jýrnaly, jyldyń úzdik new media-sy (telegram-kanal, áleýmettik jelilerdegi úzdik aqparattyq pablık) nomınatsııalary boıynsha qabyldanady.

Úzdikterdi arnaıy qurylǵan komıssııa aıqyndaıdy. Onyń quramyna medıa salasynyń damýyna eleýli úles qosqan tanymal menedjerler, jýrnalıster, qoǵam qaıratkerleri enedi. Jeńimpazdarǵa 1 mln teńge jáne syılyqtyń arnaıy estelik músinshesi tabystalady.

Eske sala ketsek, baspa, radıo jáne ınternet-jýrnalıstıka salasyndaǵy «Úrker» ulttyq syılyǵy 2017 jyldan beri taǵaıyndalyp keledi. Sol tusta Dáýren Abaev «osy syılyqtyń arqasynda jýrnalısterdiń biliktilik deńgeıi joǵarylaıtynyn» atap ótken edi.

2017 jáne 2018 jylǵy «Úrker» syılyǵynyń jeńimpazdaryn myna siltemelerden kórýge bolady: Úrker-2017 jáne Úrker-2018