«Úrker» syılyǵynyń úmitkerleri qyzyl kilem ústimen júrip ótti
ASTANA. QazAqparat - Baspa, radıo jáne ınternet jýrnalıstıkasy salasyndaǵy «Úrker-2017» ulttyq syılyǵynyń úmitkerleri qyzyl kilem ústimen júrip ótti, dep habarlaıdy QazAqparat HAA tilshisi.
Saltanatty syılyqty tabystaý sharasyna Úkimet músheleri, Parlament depýtattary jáne jýrnalıstıka salasynyń bedeldi ókilderi shaqyryldy. Sondaı-aq, búgingi keshke QR Memlekettik hatshysy Gúlshara Ábdiqalyqova, senator Darıǵa Nazarbaeva, QR Mádenıet jáne sport mınıstri Arystanbek Muhamedıuly jáne Astana ákimi Áset Isekeshev keledi dep kútilýde.
Eske sala ketsek, mamyr aıynyń basynda QR Aqparat jáne kommýnıkatsııalar mınıstri Dáýren Abaev jýrnalısterdi Baspa, radıo jáne ınternet jýrnalıstıka salasyndaǵy tuńǵysh «Úrker» ulttyq syılyǵyna qatysýǵa shaqyrǵan edi. Baıqaýǵa qatysý týraly ótinimder 7 mamyr men 10 maýsym aralyǵynda El.kz saıty arqyly qabyldandy.
Usynylǵan dúnıelerdi belgili qoǵam qaıratkerleri, zııaly qaýym ókilderi men kásibı jýrnalısterden quralǵan qazylar alqasy sarapqa saldy jáne 15 nomınatsııa boıynsha júldegerlerdi anyqtady.
Baıqaý jeńimpazdary estelik músinshe men 1 000 000 teńge aqshalaı syılyqqa ıe bolady.
Syılyq quryltaıshysy - QR Aqparat jáne kommýnıkatsııalar mınıstrligi, uıymdastyrýshy - «Qazkontent» AQ.
