«Úrker» syılyǵyna Ahmet Baıtursynuly atyndaǵy nomınatsııa engiziledi

NUR-SULTAN. QazAqparat – BAQ ókilderine arnalǵan memlekettik «Úrker» syılyǵynda jańa nomınatsııa paıda bolmaq. Bul týraly QR Aqparat jáne qoǵamdyq damý mınıstri Darhan Qydyráli málim etti, dep habarlaıdy QazAqparat tilshisi.

«Ahmet Baıtursynuly jáne basqa da Alash ardaqtylaryn ulyqtaýda Memleket basshysynyń bastamasymen kóptegen irgeli ister atqarylyp jatyr. Búgin Ahańnyń týǵan ólkesi Qostanaıda úlken toı ótý kerek edi. Tótenshe jaǵdaı bolyp qaldy. Qostanaı halqyna sabyr tileımiz», - dedi Darhan Qydyráli elordada ótip jatqan Ahmet Baıtursynulyna arnalǵan halyqaralyq konferentsııada.

Mınıstrdiń aıtýynsha, búginde Ahmet Baıtursynulynyń murasyna arnalǵan ǵylymı týyndylar jazylyp, derekti fılm túsirilip jatyr.

«Bıyl ótetin «Astana Media Week» halyqaralyq sharasynda Ahmet Baıtursynulyna arnalǵan taqyryp uıymdastyramyz. Sol sııaqty «Úrker» shyǵarmashylyq baıqaýynyń úlken bir atalymyna Ahmet Baıtursynuly ataýyn berý josparlanyp otyr», - deıdi ol.

Aıta keteıik, elordada Ahmet Baıtursynulynyń mol murasyna arnalǵan «Ahmet Baıtursynulynyń ǵylymı murasy jáne Qazaqstannyń zııatkerlik sabaqtastyǵy» atty ǵylymı-praktıkalyq halyqaralyq konferentsııa ótip jatyr.

Sondaı-aq, atalǵan shara barysynda Ahmet Baıtursynuly atyndaǵy memlekettik syılyqtyń taǵaıyndalatyny belgili boldy.